Култната фонтана „Лотос“, која се наоѓа на влезот во Градскиот парк, повторно го добива својот сјај. Град Скопје почна целосна реконструкција на фонтаната, која со децении е препознатлив белег и симбол на Скопје, но, за жал, со години беше запуштен.
– Со проектот е предвидена целосна обнова на фонтаната, како и уредување на плоштадот околу неа. Се поставуваат нова урбана опрема и современо осветлување, со што просторот ќе добие нов, модерен и достоинствен изглед, соодветен на значењето што го има за градот и за граѓаните – соопштија градските власти.
Тие додаваат дека ова култно катче повторно ќе стане место за средби, прошетки и за споделени моменти. Простор каде што генерации скопјани ќе се собираат, ќе создаваат спомени и ќе уживаат во уреден и квалитетен јавен простор, онака како што заслужува Скопје.
