Лекарите во Иран се апсат затоа што помогнале во спасувањето на животите на десетици илјади луѓе повредени за време на бруталното задушување на антивладините протести од страна на властите. Најмалку еден хирург сега се соочува со смртна казна.
Апсењата и смртните казни се дел од „кампања за одмазда“, велат организациите за човекови права, откако здравствените работници и лекарите одбија да ја игнорираат судбината на сериозно повредените демонстранти, кои често беа застрелани или избодени од блиску. Во некои случаи, лекарите поставија импровизирани центри за лекување.
Иранскиот хирург Алиреза Голчини (52) од централниот град Казвин е обвинет за „мохаребе“ – „војна против Бога“, кривично дело казниво со смрт, соопшти норвешката организација за човекови права Хенгав. Американскиот Стејт департмент побара негово ослободување.
Новинската агенција „Активисти за човекови права“ со седиште во САД, чии податоци се сметаа за веродостојни за време на претходните репресивни мерки, соопшти дека се потврдени повеќе од 6.000 смртни случаи.
Во разговор за „Гардијан“, родинината на Голчини, Нима Голчини, кој живее во Канада, рече дека хирургот бил одведен од неговиот дом на 10 јануари.
„Тој беше уапсен на исклучително насилен начин, пред неговата сопруга и син, кој има само 11 години. За време на апсењето, го претепаа толку брутално што му ја скршија раката и ребрата, а потоа го извлекоа од куќата. Моето семејство е преплашено“, рече тој.
Неколку дена пред апсењето, Голчини, кој исто така ги лекуваше демонстрантите за време на протестите „Жени, живот, слобода“ во 2022 година, објави порака на социјалните мрежи во која го сподели својот телефонски број и ги повика повредените да го контактираат за лекување.
„Сè што направи беше да ја исполни својата должност како лекар – спасувајќи животи. Тој се заколна дека ќе спаси животи. Како може некој лекар да не ја почитува таа заклетва? Не сум загрижен само за него, туку и за другите здравствени работници кои беа уапсени само затоа што останаа верни на својата професионална заклетва“, рече Нима Голчини.
Иранските власти јавно не коментираа за апсењето на Голчини, ниту ги потврдија обвиненијата против него. Сепак, шефот на иранското судство, Голамхосеин Мохсени Езеи, ги повика властите да не покажуваат никаква попустливост кон демонстрантите.
„Не смееме да молчиме пред оние кои сакаат да ја искористат ситуацијата и да ја нарушат безбедноста и мирот на граѓаните“, рече тој.
