На 20 декември, во 18 часот, Крушево ќе го започне одбележувањето на новогодишните и на божиќните празници. Здружението „Културен манифест“, со поддршка на Општина Крушево, неформална група граѓани, Локален младински совет и на многу компании, го организираат т. н. „Празничен шепот на крушевската чаршија“.
Настанот започнува со музичко-сценска изведба во 18 часот, по што ќе следува осветлувањето на крушевската чаршија, отворање на Новогодишен базар и пристигнување на Дедо Мраз. Забавата ќе ја „покрие“ „Балкан Џем“.
Она што е уникатно за овој настан е тоа што иницијативата доаѓа од поединци и од неформална група граѓани, со цел да се збогати понудата на Крушево за овој период од годината. Организаторите досега успеаја да привлечат голема поддршка од многу бизниси и општината.
Настанот ќе содржи богата програма и ќе трае сè до 6 јануари, 2026 година.
