Тони Крос, легендарниот германски играч од средниот ред и поранешен фудбалер на Реал (М), даде детална анализа на играта на Барселона под водство на Ханси Флик во својот подкаст „Einfach mal Luppen“. Иако ја пофали привлечноста на нивниот стил, тој исто така ги истакна клучните слабости за кои верува дека ќе ги чинат успех во Лигата на шампионите, пишува AS.
Крос верува дека играта на Барселона е една од најзабавните за гледање во Европа, но нивната „опсесија“ со секогаш играње на ист начин ги прави исклучително ранливи. „Барса има еден од најатрактивните стилови, ако не и најатрактивниот во цела Европа, но мислам дека преземаат премногу ризици. Во лош ден за Педри, Ламине или Рафиња, секој тим може да ги оштети и да ги победи“, рече Крос.
Тој додаде дека токму тоа ги спречува да бидат конкурентни за европската клупска титула: „Тие можат да бидат елиминирани од Лигата на шампионите. Минатата година тоа веќе им се случи со Интер, а оваа година, без разлика дали во осминафиналето, четвртфиналето, полуфиналето или финалето, во еден момент ќе се сретнат со противник кој ќе ги елиминира. Тоа ќе им се случи во Лигата на шампионите, нема да се случи во Лигата бидејќи се многу доминантни.“
Германецот особено ги истакна проблемите што се јавуваат во последните минути од натпреварите, кога заморот ги стигнува играчите, но тактичкиот пристап останува непроменет. „По 75-тата минута забележувате дека сите се поуморни и гледате дека не го менуваат својот стил на затворање на просторот. Ако сте уморни и не го менувате стилот на игра, станува многу очигледно колку сте изложени“, заклучи Крос.
