КРИЗА ВО ЦРНОТО МОРЕ: Бугарија бара ракети, противвоздушна одбрана и патролни авиони од НАТО

Бугарија побара од генералниот секретар на НАТО, Марк Руте, и од Врховниот командант на сојузничките сили во Европа, Алексис Гринкевич, да ги зајакнат нејзините воени капацитети – вклучително и ракетни системи, системи за одбрана од беспилотни летала и патролни авиони – изјави денеска бугарскиот министер за одбрана Димитар Стојанов.

„Побаравме целосен спектар на достапни средства – ракетни системи, системи за одбрана од беспилотни летала и патролни авиони“, им рече Стојанов на новинарите во Софија, каде што присуствуваше на настан по повод празникот на бугарското Воено воздухопловство, пренесе БТА.

Тој додаде дека е упатено и барање НАТО да ја демонстрира својата воена моќ на бугарска територија и во територијалните води на земјата.

Стојанов истакна дека сојузниците располагаат со ограничени ресурси, бидејќи и Романија и балтичките земји исто така бараат дополнителни капацитети.

Тој ја нагласи потребата Бугарија, Романија и Турција да развијат заедничка стратегија за операции во регионот на Црното Море.

Најави дека очекува наскоро да одржи средба со министрите за одбрана и началниците на генералштабовите на Турција и Романија, додавајќи дека Бугарија ја има и политичката поддршка од балтичките земји.

„Интензитетот на нападите во Црното Море расте од ден на ден“, рече Стојанов, укажувајќи на нападите што се случиле во романските територијални води. Според него, овие настани ја истакнуваат потребата од модернизација на бугарските вооружени сили.

Бугарскиот министер оцени дека, и покрај распоредувањето сили и ресурси во Романија, балтичките земји и Полска, не е можно да се обезбеди целосна безбедност.

Тој додаде дека и Русија и Украина поседуваат современи технологии, но сепак продолжуваат нападите со беспилотни летала и балистички ракети.

Бугарија, истакна тој, се стреми да ги намали ризиците користејќи сопствени ресурси и веќе има распоредено средства за кинетички удари и за надзор.

Во моментов земјата управува со два система за надзор на своите води, а се очекува до крајот на неделата да пристигне и трет, сосема нов систем.

Стојанов исто така изјави дека вчерашната средба во Европската унија била фокусирана на нападите во Црното Море, при што изрази надеж за брз одговор и зајакнување на капацитетите на Бугарија. Во однос на пловилото „Челси 3“, бугарскиот министер наведе дека тоа моментално е закотвено на околу 10 километри источно од Лозенец и дека се очекува да започне нова операција за влечење.

Претходниот обид беше прекинат во четвртокот поради временските услови; сега се очекува пловилото денеска да биде одвлечено до Бургас, пренесува Танјуг.