По месеци отпор кон заканите и нападите што ги принудија илјадници жители на населбата Карфур Фоил во Порт-о-Пренс да ги напуштат своите домови, познатиот хотел „Олофсон“ од 19 век – дом на голем број познати личности – беше изгорен до темел минатиот викенд во сабота навечер, во главниот град каде што хаитските банди контролираат околу 90 проценти и сега ги шират нападите не само во околината, туку и пошироко.
Сопственикот на хотелот Ричард Морс потврди за мрежата „X“ дека имотот гори, откако се појавија снимки од дрон на кои се гледа изгорената структура. Виновници за ова, како што пишува „Мајами Хералд“, се членови на коалицијата на бандите Вив Ансанм, кои го користеа хотелот како база за да ја преземат контролата врз Порт-о-Пренс и се судрија со хаитската полиција. Изворот на весникот рече дека хотелот бил едно од неколкуте места во областа што ги запалија бандите за време на судирите со полицијата, кои се интензивираа минатата сабота попладне.
– Загубата на Олофсон ја одразува неспособноста на хаитските олигарси, хаитската влада, Обединетите нации, како и на француската и американската влада – рече Морс, кој вети дека ќе го обнови хотелот.
Тој го презеде хотелот, кој се користеше како медиумски центар за време на диктатурата на Франсоа Дувалие, во 1987 година и го претвори во културен центар на Хаити. Многу познати личности престојувале таму, вклучувајќи ги Мик Џегер и Греам Грин.
– Можеше да се почувствува присуството на легендарни личности – сликари како Хектор Иполит, Филом Обен и Андре Пјер, танчерката Кетрин Данам, поранешната прва дама на САД Жаклин Кенеди, актерите Марлон Брандо, Елизабет Тејлор и Ричард Бартон и Џејмс Џонс, автор на книгата „Од тука до вечноста“, за да наброиме само неколку – рече поранешниот патрон на хотелот Мишел Ерик Гејлар.
Изградена кон крајот на 19 век, Олофсон првично била приватна куќа во сопственост на семејството Сем, кое живеело таму сè додека разбеснета толпа не го линчувала претседателот Вилебрун Гијом Сем на улиците на Порт-о-Пренс во 1915 година. Тој бил претседател само пет месеци пред неговата смрт, што довело до воена интервенција на САД и 19-годишна окупација на Хаити од страна на американските маринци. Тој бил последниот претседател на Хаити кој бил убиен – сè до атентатот врз Жовенел Моиз на 7 јули 2021 година.
Бандите станаа помоќни по убиството на Моиз, а Хаити оттогаш е без претседател.
По заминувањето на американските сили во 1934 година, Олофсон – кој го користеа маринците како болница – беше претворен во хотел следната година. Хаити се отвори по смртта на диктаторот Дивали во 1971 година, што го означи почетокот на златен период за хотелот и доаѓањето на бројни познати личности. Под раководство на Морс, хотелот се спротивстави на политичката нестабилност, опаѓањето на туризмот, земјотресите и влошувањето на насилството меѓу бандите.
– Олофсон го преживеа земјотресот во 2010 година… но не можеше да се спротивстави на човечката катастрофа – рече Гајлар.
Уништувањето на Олофсон следува по сличен напад врз друг популарен хотел, „Лоџ“ во ридовите над главниот град Порт-о-Пренс, и е дел од алармантниот пораст на вооруженото насилство меѓу бандите врз приватни домови и бизниси, кое се интензивираше претходно оваа година. Насилството го парализира Порт-о-Пренс, кој сега е речиси целосно под контрола на бандите, и брзо се шири во други региони на Хаити.
ИЗДВОЕНИ
Скопје и Софија како во басна – „лавот и глушецот“ во дипломатска арена
Данела Арсовска и вработени во Град Скопје нападнати во Чаир – завршија на ургентен
Младите бегаат од градежништво и индустрија и бараат столче во администрација
Во име на починатите пациенти ќе сведочат најблиските, преку 29 досиеја јавноста ќе дознава за несовесното лекување
