Кралот Чарлс Трети подари црвено поштенско сандаче на истражувачка станица на Антарктикот

Ново црвено поштенско сандаче, подарок од британскиот крал Чарлс Трети, пристигна за вработените во оддалечена британска истражувачка станица на Антарктикот, соопшти денес Британското антарктичко истражување (BAS).

Поштенското сандаче на Кралската пошта, со монограм на кралот Чарлс Трети, беше испратено до вработените во станицата Ротерам, која ја управува BAS со седиште во Кембриџ.

Поштенското сандаче беше испратено откако Кирстен Шо, соработник во станицата и менаџерка на поштата на Британската антарктичка територија, побара замена за претходно рачно изработеното поштенско сандаче, објави „Би-би-си“.

„Антарктикот е неверојатно место, но е исто така полн со екстреми, па затоа испраќањето пошта дома е посебен начин да ги споделите вашите искуства. Тоа е момент во вашиот живот што го запишувате на хартија и го испраќате до некого“, рече Шо.

Според Шо, примањето пошта има посебно значење за тимот на станицата Ротерам.

„По месеци теренска работа, чувството на примање писмо, опипливо парче хартија со ракопис од семејството и пријателите, е неверојатно поттикнувачко“, рече таа.

Кутијата беше доставена на Антарктикот од британскиот поларен истражувачки брод RRS Sir David Attenborough, заедно со првата голема пратка со залихи по долгата антарктичка зима.

Поштенската логистика во оваа оддалечена област е исклучително сложена, при што поштата од Ротерам се транспортира со брод или авиони на BAS до Фолкландските Острови, а потоа до RAF Brize Norton во Оксфордшир, каде што влегува во мрежата на Кралската пошта.

Високиот комесар на Британската антарктичка територија, Џејн Рамл, рече дека одржувањето на поштенската услуга „оди подалеку од симболиката“ бидејќи го потврдува присуството и наследството на Велика Британија на Антарктикот и обезбедува важна врска со остатокот од светот.

Истражувачката станица Ротера, отворена во 1975 година, е најголемиот објект на Британското антарктичко истражување и еден од најважните центри за истражување на климата во светот, објави „Танјуг“.