Крај на вековната култура: Пабовите исчезнуваат од Британија!

Во Велика Британија, пабовите, симболи на општествениот живот и заедништвото, пропаѓаат со алармантна брзина. Во 2025 година, само во Англија и Велс беа затворени 366 пабови – во просек по еден дневно. Вкупно, останаа околу 39.000 од нив, додека пред четири децении имаше повеќе од 60.000.

Причините се бројни: намалувањето на потрошувачката на алкохол кај младите, навиката за пиење дома по пандемијата, скокот на цената на пивото до осум фунти по кригла, зголемувањето на даноците, минималните плати, трошоците за енергија и деловните давачки, како и најавените построги ограничувања на алкохолот во крвта за возачите. Ова не е само економски проблем – тоа е исчезнување на културниот центар на една нација, место каде што луѓето спонтано се собираа и градеа врски без дигитални филтри.

На тоа треба да се додаде и доминацијата на кратките формати на платформи како TikTok и Instagram, каде што младите луѓе го поминуваат поголемиот дел од денот. Наместо да се дружат, разговараат, тагуваат и слават заедно на места што ги зближуваат луѓето, тие се собираат на социјалните медиуми.

Кризата ги разоткрива длабоките противречности на британското општество. Додека за осаменоста и социјалната изолација се зборува сè почесто, државните мерки дополнително ги задушуваат просторите што ги ублажуваа овие проблеми.

Пабот никогаш не бил само место за пиење – тој бил неформална зона за разговор, шега и релаксација, каде што не се мерел времето ниту се следел протоколот. Денес, помладите генерации избираат теретани и безалкохолни пијалоци, додека постарите луѓе остануваат со спомените.

Угостителите сведочат дека гостите се навикнале на поевтини алтернативи дома и дека даночните олеснувања се само симболични. Протестите и предупредувањата од професијата остануваат без ефект, додека вратите на пабовите трајно се затвораат.