Државата не може точно да утврди дали и колку се штетни козметичките производи и играчките за деца што се продаваат, забележува Државниот завод за ревизија во својот извештај за работата на санитарната инспекција. Листата на забранети супстанции во козметиката не е ажурирана ниту еднаш од нејзиното донесување во 2010 година и не е усогласена со регулативата на Европската Унија. Листата опфаќа околу 1.600 супстанции, додека во ЕУ таа во меѓувреме е проширена на 1.751 забранета супстанција. Ваквата состојба остава можност во земјава легално да се продаваат производи што во ЕУ се веќе оценети како опасни по здравјето. Причината е и во тоа што Законот за безбедност на козметичките производи не предвидува обврска за редовно ажурирање на листата.
Уште позагрижувачка е состојбата со контролата на детските играчки. Во државата не постои ниту една лабораторија опремена за испитување на фталати и бор – супстанции чија штетност е јасно утврдена. Институтот за јавно здравје врши само ограничен број анализи, а во случај на оспорување на резултатите од првичниот примерок, не постои втора независна лабораторија што би ја повторила постапката. Со тоа, законски предвидената контрола останува само формална.
Утврдени се и слабости во инспекцискиот надзор – документацијата често е на странски јазици, над 90 отсто од предметите не се архивски заверени и потпишани, а во 63 отсто од запрените постапки нема приложени докази. ДЗР нотира и сериозен недостиг од кадар: Инспекторатот е пополнет со само 59 отсто од предвидените вработени, а мнозинството инспектори се на возраст над 50 години.
Ревизијата јасно укажува дека без итни законски измени, усогласување со европските стандарди и сериозни инвестиции во лабораториски капацитети и инспекциски ресурси, системот за заштита на јавното здравје останува нефункционален и недоволно подготвен да ја гарантира безбедноста на граѓаните.
Од Државниот санитарен инспекторат велат дека веќе постапуваат по забелешките на ДЗР. „Во однос на постапката за увоз на детски играчки, козметика и забелешката за сертификатите за безбедност кои се приложуваат при увоз, веќе се отпочнати преговори со релевантни чинители за изнаоѓање на прифатливо решение“, велат од ДСИ. (П.А.)
ИЗДВОЕНИ
Унгарската „инјекција“ за општините се стопи од 250 на 149 милиони евра
Смрзнати и гладни работниците им порачаа на пратениците – пред избори нè барате, сега нè игнорирате
Мицкоски: Подготвен сум полагањето на правосудниот испит да го утврдиме со закон и на сите јазици на делови на народите спомнати во уставната преамбула
Синдикатот го блокира Собранието, се бара минимална плата од 600 евра
