Францускиот претседател Емануел Макрон денес изјави дека е „веројатно“ на учениците од средните училишта да им биде забрането да користат мобилни телефони од следната година.
Објавата претставува продолжување на постојната мерка што веќе е во сила за помладите ученици, пишува „Политико“.
На учениците во основните училишта и средните училишта во Франција веќе им е забрането да користат мобилни телефони.
Зборувајќи на настан во источна Франција, Макрон оцени дека првата фаза од забраната функционирала „доста добро“ и изрази поддршка за проширување на политиката на средните училишта, кои ги посетуваат ученици на возраст од 15 до 18 години.
Францускиот претседател потврди дека министерот за образование Едуар Жефри веќе ја разгледува идејата. Сепак, воведувањето забрана во средните училишта може да бара усвојување на нов закон. Националното собрание ја усвои сегашната забрана во 2018 година, но тој закон конкретно ги опфаќа само предучилишните установи, градинките и основните и средните училишта.
Иако влијанието на Макрон врз домашната политика ослабе откако ја изгуби контролата врз парламентот во 2024 година, претседателот се обидува повторно да се наметне на домашната сцена во последните недели. Преку серија јавни настапи, тој се обидува да покаже како планира да се соочи со предизвиците што ги претставуваат социјалните медиуми и големите интернет платформи.
