Комесарот за одбрана на ЕУ: „Ѕидот против дронови“ би можел да биде готов за една година

ЕУ би можела значително да ги подобри своите способности за откривање дронови во следната година, но ќе ѝ треба повеќе време за да развие комплетна мрежа, на копно и море, способна за следење и уништување цели, изјави денес европскиот комесар за одбрана Андриус ​​Кубилиус за „Еурактив“ (Euractiv) од Брисел.

Идејата за таканаречен ѕид против дронови брзо доби на популарност по бранот руски упади во воздушниот простор на земјите-членки на ЕУ во последните недели.

Претседателката на Европската комисија, Урсула фон дер Лајен, зборуваше за подобра одбрана од дронови во нејзиното обраќање за состојбата на Унијата претходно овој месец.

„Мора да разбереме дека ни недостасуваат можности за откривање дронови“, изјави Кубилиус за порталот од Брисел. „Можеби имаме добри можности за откривање борбени авиони и ракети, но дроновите се специфични – летаат многу ниско, мали се“, додаде тој.

Комесарот на ЕУ рече дека првиот чекор е брзо да се набават системите за откривање, што, според него, е можно.

Тој рече дека експертите рекле дека таков систем би можел да биде готов „за околу една година“ за да биде подготвен да се брани од руски напади и провокации.

Кубилиус додаде дека Европа треба да ја копира украинската војска, која распореди звучни сензори за откривање на дојдовни дронови кои инаку не би се појавиле на радарот.

Одговарајќи на прашања на настан организиран од „Еурактив“, комесарот на ЕУ рече дека ласерите се уште една опција за соборување дронови со минимални трошоци. Тој додаде дека таквата одбранбена мрежа мора да ги покрие огромните поморски граници на блокот, со оглед на упадите на дронови во Норвешка и Данска во понеделник вечерта.

Истрагата за последните упади сè уште не го идентификувала сторителот, но данската полиција вели дека тие мора да биле извршени од некој способен за тоа.

Потпретседателот на Европската инвестициска банка за одбрана и безбедност, Роберт де Грот, на собир во Брисел изјави дека се водат дискусии за тоа како да се насочи финансирањето кон источните земји на блокот како приоритет.