Колку повеќе произведуваме, толку помалку увезуваме

Вкупниот откуп и продажба на земјоделски производи во второто тримесечје од 2025 година достигнал 3,6 милијарди денари (околу 60 милиони евра), што претставува пораст од 7,2% во однос на истиот период лани, покажуваат податоците на Државниот завод за статистика. Најголемо зголемување е забележано кај откупот од индивидуалните производители, кој пораснал за 26,4% што укажува дека земјоделските производители го пласираат своите производи преку откупните претпријатија.

Премиерот Христијан Мицкоски вели дека порастот на откупот значи добра заработка за земјоделците, но и помалку увоз.

– Колку повеќе произведуваме, толку помалку увезуваме. Македонија во минатото беше позната како земја производител и извозник на храна, посебно на земјоделски производи. Во вториот квартал имаме околу 60 милиони евра повеќе споредено со она што беше во минатото. Имаме преку 26-27 проценти повеќе откупени земјоделски производи споредено со истиот период минатата година коишто како количина се за 7% повеќе споредено со истиот период лани. Земјоделците се еден од приоритетите на оваа Влада, тоа го покажавме изминативе 14 месеци. И очекувам во таа насока да продолжиме и во иднина затоа што производството на храна ни е исклучително важно – нагласи Мицкоски.

Од друга страна, продажбата на земјоделски производи од сопствено производство бележи намалување од пет проценти. Тоа значи дека дел од производството сè помалку се продава директно од земјоделските стопанства.

Трендот на пораст кај откупот и пад кај сопствената продажба го отсликува зголемениот интерес на откупувачите и поголемата сигурност што земјоделците ја бараат при пласманот на своите производи.