Познатиот британски воен аналитичар Мајкл Кларк, одговараше на прашања од гледачи и читатели за „Скај њуз“ за ситуацијата на фронтот во Украина, улогата на Западот и плановите на американскиот претседател Доналд Трамп.
По неколку месеци шпекулации и дипломатски притисок од Киев, стана јасно дека Украина нема да ги добие американските крстосувачки ракети Томахавк толку брзо. Самиот Трамп им потврди на новинарите во „Ер Форс Уан“: „Не, не го разгледувам тоа“.
Кларк верува дека Трамп е убеден дека не греши, но предупредува дека Русија се плаши од тие ракети.
„Тие се загрижени за нивниот дострел и точност. Ако Американците му дадат на Киев доволен број томахавки, да речеме 200, Украинците би можеле сериозно да ги загрозат руските рафинерии и воените цели. Тоа би го променило начинот на кој Москва размислува за продолжување на војната следната година“, рече тој.
Сепак, тој додава дека Украина не е без алтернатива. Покрај британските ракети „Сторм Шедоу“, постојат и домашни ракети Фламинго, чие масовно производство би можело да ја пресврти ситуацијата на терен.
„Ако можат да го зголемат производството, тие ракети би можеле да ја завршат работата за која се надеваа дека ќе ја завршат Томахавките“, рече Кларк, истакнувајќи дека Русите „очајно се обидуваат да најдат фабрики што произведуваат Фламинга“.
Битки за Покровск
Едно од прашањата се однесуваше и на тековните борби за Покровск, град што аналитичарите го нарекуваат „портата кон Донецк“. Кларк верува дека Украинците имаат 50:50 шанси да го задржат градот.
„Ќе биде исклучително тешко бидејќи Русите имаат бројна супериорност, но Украинците ги испраќаат своите најдобри единици во борбата – бригадата Азов и елитните единици за борба во урбаните средини“, објасни тој.
Покровск, додава тој, има вистинско стратешко значење, за разлика од Бахмут, што беше повеќе симболична цел.
„Ако Русите го окупираат Покровск, патот до Славјанск и Краматорск станува отворен. Кој ги контролира тие два града, го контролира Донбас“, предупреди тој.
Кој профитира од војната?
Кларк, исто така, одговори на прашањето кој всушност профитира од војната.
„Војната секогаш некому му користи“, рече тој, додавајќи дека големите воени индустрии произведуваат повеќе отколку во последните 20 години.
Најголем победник, верува тој, е Кина, на два начина – економски и политички.
„Тие продаваат стока на Русија што наводно е цивилна, но сите знаеме дека не е. Додека Европа и Америка гледаат кон Украина, Кина дејствува мирно во Јужното Кинеско Море и околу Тајван“, објасни воениот аналитичар.
