Кој ќе го наследи Ел Менчо на врвот на картелот „Халиско нова генерација“ по неговата ликвидација – во игра се пет можни наследници

Водачот на картелот „Халиско Нуева Хенерасион“ (CJNG), Немесио Осегера Сервантес, познат како „Ел Менчо“, беше убиен во недела, на 22 февруари, во операција на специјалните сили на мексиканската армија во Тапалпа, државата Халиско.

Осегера, кој беше приоритетна цел за федералната влада и бегалец баран од Агенцијата за борба против дрога на САД (DEA), почина за време на транспортот до Мексико Сити. Неговиот картел се прошири низ целата земја во текот на изминатата деценија, објавува EL UNIVERSAL.

Карталот „Халиско нова генерација“ (CJNG) е обвинет за трговија со дрога како што се фентанил, метамфетамин и кокаин, како и за перење пари.

Според DEA, тоа е „една од најмоќните, највлијателните и најнемилосрдните транснационални криминални организации во Мексико“ и се смета за една од „најзначајните безбедносни закани“.

Осегуера Сервантес беше на чело на картелот од неговото основање.

Две сценарија за иднината на картелот

Во интервју за EL UNIVERSAL, експертите за безбедност презентираа две можни сценарија за CJNG во блиска иднина: внатрешно реструктуирање или фрагментација. Тие тврдат дека обете сценарија подразбираат ескалација на насилството и можна диверзификација на криминалните активности.

Ерик Руиз, експерт за национална безбедност, тврди дека Немесио Осегуера, за разлика од другите криминални групи како што е семејството Гузман, „нема наследник“ и дека „нема идентификувано видливо водство“, што би можело да доведе до распаѓање на групата.

Од друга страна, експертот за јавна безбедност Виктор Санчез верува дека „тешко е картелот да се подели“.

Според него, веројатно е дека некое регионално водство ќе се обиде да се одвои, „но дека повеќето од картелите ќе продолжат под едно од водствата“ што ќе се појават.

Иако е тешко да се знае што ќе се случи во рамките на нелегалната организација, Санчез забележа дека секогаш може да има незадоволни оперативци и дека „мазните транзиции“ не се вообичаени.

Пет можни наследници на „Ел Менчо“

Санчез гледа пет лица како можни идни лидери на CJNG по падот на „Ел Менчо“.

Првото име на листата е Хуан Карлос Валенсија Гонзалез, познат како „Ел 03“. Тој е посинок на „Ел Менчо“ и негов „природен наследник“, за кого DEA објави награда до 5 милиони долари.

Вториот можен наследник е Аудијас Флорес Силва, „Ел Жардинеро“, кој е задолжен за операциите на картелот во неколку држави, како што се Халиско и Мичоакан, и за проширување во други, како што е Сакатекас.

„Ова е лице со големи способности и приходи, кое во некоја смисла е најмоќното меѓу „сопствениците“ на CJNG и не припаѓа на семејствата Осегера или Валенсија“, за кои може да се каже дека се двете главни семејства на криминалната организација, утврди Санчез.

Третото име е Рикардо Руиз Веласко, „Добле Р“, кој работи во пошироката област Гвадалахара, главната оперативна точка на картелот.

Потоа Санчез го споменува Хераклиус Гереро Мартинез, „Тио Лако“, кој, заедно со семејството Гереро, е одговорен за две нелегални шеми за кражба на гориво, познати како „хуачикол“.

Последен на листата е Гонзало Мендоза Гаитан, познат како „Ел Сапо“, задолжен за операциите на картелот во морските пристаништа, „особено во Манзаниљо, најважното пристаниште во земјата, каде што влегуваат повеќето хемиски прекурсори од Кина, Индија и Тајланд“, пренесе „Индекс“.