Кремљ објави дека европските сили ги попречуваат напорите на американскиот претседател Доналд Трамп за постигнување мир во Украина и дека Русија ќе продолжи со своите акции сè додека Москва не види вистински знаци дека Киев е подготвен за мир.
Портпаролот на Кремљ, Дмитриј Песков, изјави дека „европската страна на војната“ продолжува да ги попречува напорите на САД и Русија во врска со Украина.
Песков изјави дека Русија му е благодарна на Трамп за неговите напори и дека Москва ќе ја продолжи „специјалната воена операција“ бидејќи досега не видела никакви „реципрочни“ потези насочени кон мир, пренесува РТС.
Претседателот на САД, Доналд Трамп, изјави дека средбата меѓу рускиот претседател Владимир Путин и неговиот украински колега, Володимир Зеленски, е малку веројатна и дека американските авиони можеби ќе бидат потребни за да ѝ помогнат на Европа да ја заврши војната.
„Трилатералната средба ќе се одржи, билатерална – не знам. Понекогаш луѓето не се подготвени за тоа. Понекогаш мора малку да се борат пред да можете да ги натерате да престанат. Но, тоа се случува веќе долго време. Многу луѓе загинаа“, рече Трамп во интервју за американскиот весник „Дејли Колер“.
Тој додаде дека е подготвен да помогне со безбедносни гаранции, дури и ако тоа вклучува воздушна поддршка од САД, за да се запре војната.
