Новите парфеми се лансираат доста често во денешно време, но ретко кој мирис успева да го задржи вниманието повеќе од неколку сезони. Сепак, постои еден исклучок кој е неизбежно присуство во светот на луксузот, модата и мирисите повеќе од еден век – Chanel N°5.
Од своето создавање во 1921 година, овој иконски парфем не само што ги преживеал промените во трендовите, туку честопати самиот ги диктирал, и до ден-денес останува најпродаваниот парфем во светот.
Неговите горни ноти се составени од иланг-иланг, бергамот, лимон и алдехиди, средните ноти се јасмин, роза, перуника и крин од долината, а основните ноти се сандалово дрво, ветивер, ванила, дабов мов, пачули и амбер. Резултатот е чист и препознатлив мирис кој го сакала и легендарната Мерилин Монро.
Според Шенон Лолор од Who What Wear, Chanel N°5 е парфем кој, и покрај својата долга историја, сепак успева да биде модерен, релевантен и неповторлив.
„И покрај тоа што работам како експерт за парфеми, безброј пати сум прашала некого што носи, а одговорот бил број 5. Ниеден парфем не може да се спореди со неговата долговечност, луксуз и универзална привлечност“, истакнува Лолор.
