Организаторите на мастерс тенискиот турнир во Рим најавија дека ќе ги зајакнат контролите со цел да се потисне несоодветното однесување на одредени обложувалници што го нарушуваат текот на натпреварите од трибините.
– Феноменот на таканаречените живи обложувачи на тениските терени, како и на други спортски арени, е под строг надзор веќе долго време. Иако им е дозволено обложувањето на возрасните лица, во согласност со законот, сметаме дека е целосно неприфатливо оваа активност да има каква било врска со професионалните тениски натпревари –изјави директорот на турнирот, Паоло Лоренци.
Италијанската тениска федерација (FITP), која го организира турнирот, најави дополнителна поддршка за полицијата и за АТП за да се спречат инциденти како оние што се веќе евидентирани, иако не беа дадени конкретни примери.
– FITP ќе се погрижи лицата идентификувани како фактори на нарушувањето никогаш повеќе да не стапнат на теренот на кој било настан под покровителство на Федерацијата – рече Лоренци.
Обложувањето во живо на тениските турнири е во пораст во последниве години, при што обложувачите сè повеќе се фокусираат на исходот од поединечните поени или брејкови. Поради временското задоцнување помеѓу акцијата на теренот и преносот на платформите за обложување, присуството на самото место им дава предност на обложувачите за облози во последната секунда.
Од почетокот на турнирот во Рим, неколкумина тенисери се пожалија на однесувањето на гледачите во првите редови, особено на страничните терени, каде што поединци гласно навиваат или ги навредуваат, сè со цел да влијаат на текот на натпреварот.
Во текот на натпреварот од второто коло, против Италијанецот Лука Нарди, Австралиецот Алекс де Минор го замоли судијата да интервенира поради двајца гледачи што постојано го прекинуваа од трибините веднаш зад него.
