Две климатски активистки денес ја испрскаа со црвена боја на фасадата на црквата Саграда Фамилија во Барселона во знак на протест против неактивноста за справување со климатската криза, која екологистите ја обвинуваат за шумските пожари што ја опустошија Шпанија, пренесе „Бета“.
Во видео објавено на социјалните мрежи од здружението „Футуро Вегетал“, може да се видат активистките како се апсат од обезбедувањето откако прскале со боја на основата на столбот на познатата катедрала, извикувајќи „Климатска правда“.
„Со овој протест, еколошката група го осудува недостатокот на акција од страна на владата против климатската криза и нејзините последици за пожарите што ја опустошија Шпанија и поголемиот дел од Европа ова лето“, рече „Футуро Вегетал“.
Црквата „Саграда Фамилија“, дизајнирана од архитектот Антони Гауди (1852-1926), која сè уште е недовршена, е една од главните атракции на туристичкиот град Барселона.
Во август, Шпанија претрпе бран драматични шумски пожари во кои загинаа четири лица и беа уништени повеќе од 350.000 хектари.
Пожарите претставуваат „една од најголемите еколошки катастрофи“ што земјата ја доживеала во последниве години, соопшти шпанската влада, поврзувајќи го нивниот обем со климатските промени.
„Футуро Вегетал“ одржа десетици слични протести во последниве години, кои многу музеи ги осудија како вандализам, вклучително и еден во 2022 година во кој нејзините активисти ги залепија рацете на рамките на сликите од шпанскиот мајстор Франциско де Гоја во музејот Прадо во Мадрид.
