Кирил Лазаров: Да не бев Македонец, немаше да се вратам и да работам во Македонија

Кирил Лазаров е едно од најголемите имиња во историјата на македонскиот спорт и светски ракометен бренд кој со години ја претставуваше Македонија на највисоко ниво.

Легендарниот десен бек остави огромна трага во светскиот ракомет, а по завршувањето на блескавата играчка кариера реши своето знаење, искуство и авторитет да ги стави во служба на македонскиот ракомет.

Наместо да замине и да гради тренерска кариера во странство, Лазаров избра да остане во Македонија и да ја преземе репрезентацијата во еден од најтурбулентните периоди. Денес тој е македонски селектор, но истовремено е и тренер на Алкалоид, каде што работи со една од најперспективните генерации во македонскиот ракомет.

Во интервју за „Балкан хендбол“, Лазаров отворено зборуваше за својата одлука да остане во Македонија и за односот кон луѓето кои дале голем дел од својот живот за националниот тим. За него, причината поради која се вратил во македонскиот ракомет е едноставна – љубовта кон татковината.

• Да не сум Македонец, немаше да се вратам да работам во Македонија, вели Лазаров, нагласувајќи дека неговата одлука не била мотивирана од личен интерес.

Легендарниот ракометар потсетува дека зад него се 25 години играчка кариера во која речиси секогаш беше на располагање на македонската репрезентација. Но, неговата приказна со националниот тим не заврши со последниот натпревар во играчката кариера.

Напротив, Лазаров веднаш презеде нова, исклучително тешка задача – да го предводи македонскиот ракомет како селектор и да помогне во создавањето на новата генерација.

• Можат да велат дека сум ваков или онаков, но не може да ми се спори дека не сум дал доволно за Македонија, порача Лазаров.

Тој посочува дека покрај 25-те години како играч, веќе шест години продолжува да работи за македонскиот ракомет како тренер. Во тој период работеше и со младите категории и со сениорската репрезентација, со цел да се направи постепена смена на генерациите.

• Да го водам овој македонски проект за нашата нова генерација, да се замени старата со новата и да нема некој поголем пад. Тоа не може никој да ми го спори, вели селекторот.

Токму транзицијата од една во друга генерација е еден од најголемите предизвици со кои се соочува македонскиот ракомет.

По годините во кои Македонија имаше генерација предводена од Лазаров, Кире сега има задача да создаде нова репрезентација која ќе биде конкурентна на најголемите европски и светски натпревари. Тоа не е лесна задача, особено ако се земе предвид дека во моментот кога ја презеде репрезентацијата, ситуацијата не беше идеална. Сепак, Лазаров не се повлече и не избра полесен пат.

• Затоа барам голема почит. Прифатив да се вратам и да влезам во тој таканаречен хаос, го направив тоа од љубов и затоа што ја сакам Македонија, вели легендата на македонскиот ракомет.

Неговата порака е јасна – може да има критики за неговата работа, резултатите или начинот на кој ја води репрезентацијата, но не може да се доведе во прашање неговата посветеност кон Македонија.

Лазаров со години беше еден од најдобрите стрелци и десни бекови во светскиот ракомет, но по крајот на играчката кариера не ја избра удобноста. Наместо тоа, се врати дома и ја прифати една од најтешките задачи во македонскиот спорт.