– Половина век од своето основање, Кинотеката на Македонија не е само простор за проекции туку и жив културен организам што активно ја обликува филмската свест, го чува колективното паметење и создава простор за дијалог меѓу минатото, сегашноста и иднината на киното. Јануари 2026 е уште една потврда дека оваа институција останува незаменлив столб на културниот живот и еден од најважните чувари на филмската уметност во земјава – посочуваат од Кинотеката
Програмата на Кинотеката на Македонија за јануари 2026 претставува внимателно осмислена и содржински богата целина, што уште еднаш ја потврдува улогата на оваа институција како темел на филмската култура, едукацијата и на критичката мисла во нашата земја.
– Во година во која Кинотеката одбележува значајни педесет години од своето формирање, јануарската програма функционира и како симболичен преглед на нејзината мисија: да го чува, прикажува и контекстуализира филмското наследство, истовремено отворајќи простор за современи авторски гласови и за нови генерации гледачи – посочуваат од оваа институција.
Особено место во програмата заземаат тематските целини „Киноутро“, со проекции на анимирани филмови наменети за младата публика, чија цел е да ѝ се приближи киното како уметност и искуство уште од најрана возраст. Притоа ќе може да се видат „Таинствената шума“, „Биби и Боби во светот на бајките“ и „Тафити и пустинската авантура“. Преку овие проекции (распоредени до 16 јануари), Кинотеката активно ја гради идната публика и ја зацврстува врската меѓу младите и филмскиот медиум.
Во јануарската селекција се вклучени и избрани содржини од фестивалот „Киненова“ (на 21, 22, 23 и 24 јануари), кои носат свежи авторски перспективи и современи филмски практики, како и проекциите на играниот „Југо Флорида“ во режија на Владимир Тагиќ (15, 16 и 27 јануари) и документарецот „Фанк Ју“ на Франко Дујмиќ (26 јануари), кои преку ангажиран и аналитичен пристап ги отвораат културните и општествените прашања на регионот.
Особено внимание привлекува и долгоочекуваниот музички документарец „Трет свет“ (28 и 29 јануари), посветен на култниот хрватски бенд „Хаустор“, кој преку архивски материјали и сведоштва нуди длабински поглед кон една од највлијателните музички појави на ексјугословенскиот културен простор. Ова е приказна за две креативни спротивности во бендот: Дарко Рундек и Срѓан Сахер. Во режија на Арсен Оремовиќ, филмот открива како една заедничка чувствителност кон магијата на секојдневниот живот еднаш споила два контрастни уметнички света за да создадат трет.
Домашната продукција е застапена со проекциите на најновите македонски филмови „Утре наутро“ (17 јануари) во режија на Јани Бојаџи и „Сите го викаат Реџо“ на Ибер Деари (20 и 26 јануари), копродукција со Косово и со Албанија, што сведочи за отвореноста на македонската кинематографија кон регионалната соработка и кон актуелните тематски предизвици. Оние што го пропуштиле, месецов во Кинотеката ќе можат да го погледнат и „Диџеј Ахмет“ на Георги М. Унковски (15, 16 и 17 јануари), за 15-годишно момче од јуручко село во Македонија што наоѓа засолниште во музиката, истовремено справувајќи се со очекувањата на својот татко, конзервативната заедница во која живее и со првото љубовно искуство.
Програмата се заокружува со проекцијата на антологиското ремек-дело „Небото над Берлин“ на Вим Вендерс (30 јануари), филм што и по децении останува непресушен извор на инспирација, поетски запис за човечката осаменост, љубовта и за духовната потрага по смислата. Неговото прикажување во рамките на јубилејната година на Кинотеката има и дополнителна симболичка тежина, потсетувајќи на континуитетот на филмската уметност и на нејзината моќ да опстои над времето.
– Половина век по своето основање, Кинотеката на Македонија не е само простор за проекции туку и жив културен организам што активно ја обликува филмската свест, го чува колективното паметење и создава простор за дијалог меѓу минатото, сегашноста и иднината на киното. Јануари 2026 е уште една потврда дека оваа институција останува незаменлив столб на културниот живот и еден од најважните чувари на филмската уметност во земјава – додаваат од Кинотеката. (Н.И.Т.)
