Кина со контрамерки за САД – против 20 воени компании и 10 високи раководители кои го вооружувале Тајван

Како одговор на најновото соопштение на САД за продажба на оружје во голем обем на кинескиот регион Тајван, Кина одлучи да преземе контрамерки, во согласност со Законот за спротивставување на странските санкции на Народна Република Кина, против 20 американски воени компании и 10 високи раководители кои во изминатите години биле вклучени во вооружувањето на Тајван, соопшти портпаролот на Министерството за надворешни работи на Народна Република Кина, во однос на контра мерките против продажбата на американско оружје на Тајван.

-Уште еднаш нагласуваме дека прашањето за Тајван се наоѓа во самото јадро на основните интереси на Кина и претставува првата црвена линија што не смее да се премине во односите меѓу Кина и САД. Секој што ќе се обиде да ја премине оваа линија и да презема провокативни дејствија по прашањето за Тајван ќе се соочи со цврст одговор од Кина. Секоја компанија или поединец што ќе се вклучи во продажба на оружје на Тајван ќе ја сноси цената за таквото дејствување. Ниту една земја или сила никогаш не смее да ја потцени решителноста, волјата и способноста на кинеската влада и народ да го заштитат националниот суверенитет и територијалниот интегритет, вели тој.

Портпаролот додаде дека Кина уште еднаш ги повикува Соединетите Американски Држави да се придржуваат до принципот „една Кина“ и до трите заеднички коминикеа меѓу Кина и САД.

-Да постапуваат во согласност со заложбите дадени од американските лидери, да ги запрат опасните чекори за вооружување на Тајван, да престанат да го поткопуваат мирот и стабилноста во Тајванскиот Теснец и да не испраќаат погрешни сигнали до сепаратистичките сили што се залагаат за „независност на Тајван“. Кина ќе продолжи да презема решителни мерки за цврста одбрана на националниот суверенитет, безбедноста и територијалниот интегритет, изјави портпаролот на кинеското МНР.