Ќе се уреди просторот меѓу Градечка Река и улицата „Кеј 30 Август“ во Виница

Општина Виница почна со реализација на уште еден проект, насловен „Да ја поканиме природата во нашите градови“, кој се спроведува преку програмата за прекугранична соработка меѓу Македонија и Бугарија и кој е финансиран од Европската Унија.

Проектот се реализира во партнерство со збратимената Општина Банско, Република Бугарија.

Во Општина Виница, со проектот се планира да се уреди просторот помеѓу Градечка Река и улицата „Кеј 30 Август“ со изградба на пешачка патека во должина од 674 метри и ширина од два метра, да се уреди и опреми со урбана опрема – клупи за седење, канти за отпадоци, да се предвиди дел со зеленило, ниско и високо зеленило и да се постави осветлување со канделабри на сончева енергија.

– На постојната локација, се предвидува да се отстранат оние дрвја и стебла што се веќе дотрајани или оштетени од невреме или од други причини и да се насадат нови, и тоа 14 сребрени смреки, 25 листопадни дрвја (sycamore). Сите стебла што се во добра вегетативна состојба и не се на трасата на патеката, се задржуваат и се вклопуваат во новиот амбиент – информираат од Општина Виница.

Освен тоа, предвидено е да се изврши замена на дотраените рабници меѓу коловозот и тротоарот со нови и да се постави систем за наводнување на зелениот појас и на дрвјата.