Општина Центар ќе почне со поставување уреди за мерење бучава. Градоначалникот Горан Герасимовски информира дека постапката за набавка на уредите е завршена и нивното поставување треба да почне веднаш.
На состанокот со раководителите на сектори, Герасимовски истакна дека уредите се приоритет и дека треба да се инсталираат што поскоро.
– Предлагам тие да почнат што поскоро да се поставуваат. Ако можеме, уште од оваа недела да почнат да се поставуваат на 30 локации – изјави тој.
Одлуката каде точно ќе бидат поставени мерните станици ќе зависи од потребите на жителите на Центар, а локациите ќе се одредуваат според бројот на пријави и поплаки.
– Уредите ќе бидат поставени на ударните локации каде што граѓаните најмногу се жалат на бучава во ноќните часови – нагласи Герасимовски.
Во рамките на состанокот, градоначалникот најави и дека во ноември ќе се одржат буџетските форуми, каде што граѓаните се добредојдени да дадат предлози за новата програма и буџет.
Покрај ова, Герасимовски информира и за други активности, како што се: хортикултурно и партерно уредување на плочникот кај Зелен пазар, но и за тоа дека Општината нема да го чека Градот Скопје и сама ќе преземе мерки за одржување на хигиената, со секојдневна работа на хигиеничарите.
