Ќе се финансираат проекти за воннаставни активности во основните училишта

Општина Центар ќе финансира проекти за воннаставни активности во основните училишта на својата територија. За таа цел е објавен јавен повик.

Проектите треба да се наменети за ученици, наставници и родители и да се на тема „Улогата на наставниците и стручните соработници во пренесување на вредностите и моралните норми кај младите“.

Општината појаснува дека проектните активности треба да се реализираат во периодот мај – јуни 2025 година, а избраниот проект ќе добие финансиска поддршка во износ од 250.000 денари, еднократно исплатени од Буџетот на Општината.

Право на учество имаат здруженија на граѓани и други организации од областа на образованието, со седиште на територијата на Општина Центар – Скопје, кои ги исполнуваат утврдените критериуми како: досегашно искуство во реализација на воспитно-образовни проекти, проширување на активностите во сите општински основни училишта, вклучување на обучувачи со високо научно звање (доктори на науки) од релевантни области, родова и старосна рамноправност и детален финансиски план.

Градоначалникот на Општина Центар, Горан Герасимовски, по повод објавениот повик истакна дека училиштата во Центар не се само места за настава, туку и средини каде што се градат вредности и се развиваат карактери.

-Со овој повик вложуваме во образованието како темел на одговорно и морално општество, каде што наставниците и стручните кадри имаат клучна улога во воспитувањето на младите – изјави Герасимовски.

Рокот за поднесување пријави е до 20 мај 2025 година до 15 часот.