Ќе се финансираат 829 проекти во вкупна вредност од 14 милијарди денари

– Иднината не започнува глобално и централно, таа започнува локално, со изградена улица во едно село, со нова водоводна мрежа, со реновирано училиште во рурална општина, со локална економија што добива ветер во грб. Тоа се темелите на стабилна и успешна држава, истакна премиерот Христијан Мицкоски во обраќањето на Меѓународната конференција за регионален развој која се одржа во Гегелија.

Тој нагласи дека во динамичен и непредвидлив свет, секоја држава мора да го постави својот модел на развој.

– Најсилни ќе бидат оние што ќе изградат силни локални заедници, затоа што развојот не смее да зависи од географија, политичка припадност или медиумска експонираност, туку од реалните потреби на луѓето. Затоа Владата обезбеди инвестициската линија од 250 милиони евра за капитални проекти на општините – истакна Мицкоски.

Финансирање од оваа инвестициска линија побарале општините за 829 проекти во вкупна вредност од 14 милијарди денари. Од овие проекти, 590 се од областа на транспортот и инфраструктурата (нови улици, локални патишта, мостови, плоштади, јавни површини), 143 проекти се насочени кон животната средина (канализациски мрежи, водоводи, прочистителни станици, зелени површини, мерки за енергетска ефикасност).

– Во оваа заедничка мисија, не сме сами. Тука се сите наши меѓународни партнери –  Европската Унија, Обединетите Нации, Светската банка, Швајцарската и Германската развојна соработка, УСАИД и многу други. Вашата поддршка не е само финансиска. Таа е вредносна. Таа е во знаење, искуство и визија. Благодарение на вас, денес многу општини имаат стратегии, таму каде што пред десет години имале само проблеми – рече Мицкоски.