Ќе правиме ајвар со турски пипер, а домашниот ќе остане за индустријата  

Падна цената на индустриската пиперка ајварка, која во Струмичко се откупува по 20 денари за килограм. Земјоделците велат дека причината за намалување на цената на домашните земјоделски производи е увозот на пиперки, домати, краставици од Турција, Албанија, Грција… И покрај тоа што годинава има доволно домашни пиперки и за индустријата и за граѓаните – за ајвар, увозот ја руши цената. Причината за големиот диспаритет во цената на зеленчукот на пазарите во Скопје и на оние во другите градови во државата се високите маржи, кои ги ставаат трговците и кои одат и до 100 отсто. Според нивните пресметки, вкупните транспортни трошоци за еден килограм пипер од Струмица до Скопје не се повисоки од два денара, а разликата во цената е од 60 до 70 денари.

– Имаме увоз на индустриска пиперка најмногу од Турција, која се увезува во пакети. Оваа пиперка не е класифицирана, има долг транспорт и квалитетот, секако, не е ист со домашната, која веднаш се продава. Во екот на најголемо производство, ние увезуваме и затоа не можеме да ги продадеме нашите. Кога имаме наше производство, не треба да се увезува за да не падне цената. Турската пиперка е поевтина, бидејќи имаат поевтини репроматеријали и поголеми стимулации од државата – вели за весникот ВЕЧЕР Ристо Велков, претседател на Регионалниот сојуз на земјоделци од Струмица.

Според него, причина за големиот диспаритет на цените во Скопје и на пазарите во другите градови во државата се високите маржи на трговците, кои достигнуваат и до 100 отсто.

– Пиперките, доматите и другите видови зеленчук на пазарите во Скопје се продаваат три пати поскапо. Трговците ја купуваат пиперката во Струмица за 20 до 30 денари, а во Скопје ја продаваат по 60-70 денари, а транспортните трошоци не се повисоки од два денара за килограм. Најголема заработка имаат трговците, кои се втора рака, односно оние што купуваат од Кванташки и продаваат на зелените пазари – вели Велков.

Земјоделците сметаат дека треба во државата да има поголема контрола на тоа што се увезува, од каде, по која цена…

– Мора да се почитува Договорот за слободна трговија, но мора да постојат и механизми за заштита на домашното производство. Треба да се има контрола што се увезува, од каде, по која цена и да се стави ред во откупот и во трговијата со земјоделски производи. Трговците не ја почитуваат законската регулатива во државата, имаме монопол и на пазарите на големо и на мало, а индивидуалните земјоделци се оставени сами да се борат со конкуренцијата – вели Ѓорѓи Каракашев од Националната земјоделска мрежа.

Земјоделците велат дека прекупците ја продаваат ајварката по 55-60 денари пакет, во кој има најмалку пиперки од прва класа, повеќето се од втора и дел од трета класа. Тоа значи дека средната цена на пиперката трговецот го чини околу 30 денари со пресметан превоз или со 55-60 денари, неговата заработка е од 80 до 100 проценти.

Благите пиперки се 40-50 денари, лутите 30-40 денари, краставиците 25-30 денари, доматите 35- 50 денари, корнишоните 25 -30 денари, зелката 10 денари, компирите 25- 30 денари. Ова се цените на некои од земјоделските производи на Кванташкиот пазар во Струмица. Доколку се споредат со оние на пазарите во Скопје, може да се забележи какво е нивното движење од примарните производители до крајните потрошувачи. На Кванташкиот пазар во Струмица, кромидот е 25 денари, модриот патлиџан осум денари парче, морковот 30 денари, лукот 200-250 денари, сливите 40 денари, јаболката 40-45 денари, а грозјето 40 денари. Цените, пак, на пазарите во Скопје се следни: благите пиперки се 60 денари, лутите пиперки 100 денари, краставиците и корнишоните 60 денари, зелката 20 денари, компирот и кромидот 40 денари, модриот патлиџан 20 денари парче, доматите 60-80 денари, модрите сливи 70 денари, грозјето и јаболката 80 денари. Ајварката од прва класа е 80 денари.

(А. С.)