Tрамп сака да го казни Харвард што го одби: Размислува да повлече 3 милијарди долари од Харвард и да ги пренасочи во стручните училишта

Американскиот претседател Доналд Трамп објави дека ја разгледува можноста за повлекување на 3 милијарди американски долари федерални грантови од Универзитетот Харвард и пренасочување на средствата во стручните училишта низ САД, наведувајќи дека престижниот универзитет треба да „плати цена“ за, како што тврди, неговото одбивање да се усогласи со националниот интерес.

Трамп на својата социјална мрежа Truth Social рече дека е време да се „преиспита каде одат парите“ и дека „на пазарот на трудот му требаат конкретни вештини, а не идеолошки центри“.

Најавата доаѓа само неколку дена откако администрацијата на Трамп се обиде да му забрани на Харвард да прима странски студенти, што беше привремено блокирано од федералниот суд, пренесува Ројтерс.

Судот во Вашингтон во петокот пресуди дека забраната за упис на странски студенти ќе претставува „јасно кршење на Уставот“ и ќе има „непосреден и разорен ефект“ врз универзитетот и над 7.000 носители на студентска виза на Харвард.

Универзитетот Харвард претходно ја тужеше администрацијата на Трамп за замрзнување на споменатите средства, главно наменети за биомедицински истражувања преку Националниот институт за здравство (NIH).

Последната закана на Трамп е дел од пошироката конфронтација меѓу американскиот претседател и елитните образовни институции, кои тој и републиканците често ги обвинуваат дека се пристрасни и наклонети кон левичарските идеи.

Конфликтот со Харвард се повеќе добива политичка димензија и може да игра значајна улога во изборните пораки на кампањата на Трамп, насочени кон критикување на образовната елита и фаворизирање на алтернативни модели на образование, додава британската агенција.