Шефицата за надворешна политика на Европската Унија, Каја Калас, се обрати на медиумите по денешниот состанок на Советот за надворешни работи во Брисел, потврдувајќи дека Словачка денес го блокирала усвојувањето на 18-тиот пакет санкции против Русија.
Таа го започна својот говор зборувајќи за Украина и Русија:
„Руската бомбардирачка кампања достигна рекордни размери, а исто така сме сведоци на зголемена употреба на забрането хемиско оружје од страна на Русија во Украина. Сето ова покажува дека Русија не сака мир.“
Потоа таа зборуваше за санкциите:
„Навистина ми е жал што денес не постигнавме договор. Морам да кажам дека бевме многу блиску до убедување на Словачка. Комисијата исполни сè што побараа. Сега топката е во дворот на Словачка и ние мора да го финализираме овој договор. Веќе поминаа два месеци.“
Калас нагласи: „Санкциите се неопходни за да се одземе капацитетот на Русија да ја води оваа војна, а Европската Унија ќе продолжи да ја зголемува цената, така што запирањето на агресијата ќе стане единствениот пат напред за Москва.“
Таа додаде дека ги поздравува најавите на Трамп од синоќа, но вели дека ЕУ би сакала да ги види САД како „преземаат дел од товарот“.
„Америка и Европа работат заедно, и ако работиме заедно, тоа може да изврши притисок врз Путин сериозно да преговара. Единствениот начин да се натера Путин да ја заврши оваа војна е да се удри решително“, рече Калас.
