Нудејќи договори во вредност од милијарди долари во енергетиката и во ретките метали, Москва планираше да ја прецрта економската карта на Европа и во исто време да внесе јаз меѓу Америка и нејзините традиционални сојузници. Во Виткоф, долгогодишниот партнер на Трамп во голф, и Кушнер, чиј инвестициски фонд „Афинити партнерс“ привлече милијарди од арапските монархии, Дмитриев пронајде идеални соговорници, пишува „Волстрит џурнал“
Трojцa моќни бизнисмени, од кои двајца Американци и еден Русин наведнати над лаптопи во Мајами Бич минатиот месец, наводно смислувале план за ставање крај на долгата војна на Русија со Украина. Сепак, вистинскиот обем на нивниот проект бил многу поголем, откриваат извори запознаени со разговорите. Имено, во тајност се подготвувала основата за да се извлече од изолација руската економија вредна два трилиони долари, при што американските компании би биле првите што ќе се постават во линија и ќе ги престигнат европските конкуренти во искористувањето на придобивките, пишува „Волстрит џурнал“.
На својот крајбрежен имот, милијардерот и магнат за недвижности, Стив Виткоф, кој стана специјален претставник на претседателот Трамп, беше домаќин на Кирил Дмитриев, шефот на рускиот суверен фонд за богатство и преговарач избран од Владимир Путин. Дмитриев беше тој што во голема мера го обликуваше документот што го разгледуваа. Џаред Кушнер, зет на претседателот, се придружи на состанокот, пристигнувајќи од неговиот дом во близина, на остров познат како „Бункерот на милијардерите“.
Дмитриев промовирал план според кој американските компании би користеле околу 300 милијарди долари од руската централна банка замрзнати во Европа за заеднички инвестициски проекти на САД и Русија и за реконструкција на Украина предводена од САД. Американските и руските компании би можеле да се здружат за да го искористат огромното минерално богатство на Арктикот, наведува весникот. Дмитриев со месеци тврди дека нема ограничување за тоа што би можеле да постигнат двата долгогодишни соперници: нивните вселенски индустрии би можеле дури и да спроведат заедничка мисија на Марс со помош на „Спејс икс“ на Илон Маск. За Кремљ, овие разговори беа кулминација на стратегија осмислена уште пред инаугурацијата на Трамп, со цел да се заобиколи традиционалниот американски безбедносен апарат и да се убеди администрацијата дека не ја гледа Русија како воена закана, туку како земја со огромни деловни можности. Нудејќи договори во вредност од милијарди долари во енергетиката и ретките метали, Москва планираше да ја прецрта економската карта на Европа и во исто време да внесе јаз меѓу Америка и нејзините традиционални сојузници. Во Виткоф, долгогодишниот партнер на Трамп во голф, и Кушнер, чиј инвестициски фонд „Афинити партнерс“ привлече милијарди од арапските монархии, Дмитриев пронајде идеални соговорници. И двајцата го делеа прагматичниот пристап на Трамп кон геополитиката, што може да се сумира во една реченица: границите се помалку важни од бизнисот.
– Русија има толку многу огромни ресурси, огромни пространства земја. Ако сето тоа го пуштиме во движење, и сите напредуваат и сите се дел од тоа, и има корист за сите, тоа природно ќе биде бедем против идните конфликти. Бидејќи сите напредуваат, изјави Виткоф за „Волстрит џурнал“, опишувајќи ја својата визија за деловно партнерство Русија – Украина – Америка.
Кога верзија од планот од 28 точки беше објавена во јавноста претходно овој месец, тоа предизвика реакција. Лидерите во Европа и Украина се пожалија дека планот во голема мера ги одразува руските ставови и ги погазува речиси сите црвени линии на Киев. Кога европските лидери се состанаа оваа недела за да разговараат за планот, полскиот премиер Доналд Туск даде краток коментар: „Знаеме дека не станува збор за мир. Станува збор за бизнис“.
Историјата ќе покаже дали Путин го прифатил овој пристап за навистина да ја заврши војната или тоа е само трик за смирување на САД, а воедно и продолжување на конфликтот во кој верува дека мора да победи. Знак дека можеби е сериозен е фактот што некои од неговите најблиски пријатели, санкционираните милијардери од Санкт Петербург – Генадиј Тимченко, Јуриј Ковалчук и браќата Ротенберг – испратиле претставници на состаноци со американски компании за да истражат зделки во рударството и енергетиката. Ова вклучува оживување на гигантскиот гасовод „Северен тек“, кој е под санкции на ЕУ, наведува меѓу другото „Волстрит џурнал“.
