Како Трамп ја користи претседателската функција за да заработи милијарди?

Во Соединетите Американски Држави претседателите, потпретседателите и другите високи функционери се обврзани според Законот за владина етика од 1978 година, донесен по скандалот „Вотергејт“, да ги објавуваат своите финансии годишно. Извештаите се доставуваат до Канцеларијата за владина етика (ОГЕ) и се достапни за јавноста. Како што известува „Дојче веле“ (ДВ), откако беше повторно избран за претседател на САД, Доналд Трамп постојано се соочува со обвинувања дека остварува лична добивка од претседателската позиција. Му се припишуваат трансакции со обврзници, акции, недвижнини и криптовалути кои добиваат на вредност благодарение на неговите политички одлуки.

Според тековните документи на OGE, Трамп направил повеќе од 600 финансиски трансакции и инвестирал преку 100 милиони долари во корпоративни, комунални и државни обврзници од 21 јануари годинава. Меѓу компаниите чии обврзници ги купил се „Ситигруп“, „Морган и Стенли“, „Мета“, Т-Мобајл САД, „Хоум депо“ и „Јунајтед хелт“. Со тоа, тој има акции во сектори кои би можеле да профитираат од политичките одлуки на неговата администрација, како на пример, дерегулација на финансискиот пазар. Критичарите го гледаат ова како потенцијален конфликт на интереси.

За акциите, пак, информира ДВ, нема јавна евиденција за купувања или продажби од почетокот на неговиот втор мандат. Сепак, според најновиот извештај на крајот од 2024 година, Трамп имал значителни удели во технолошки и други големи компании на кои може да се влијае со одлуки. Според „Дојче веле“, најголемите индивидуални позиции се регистрирани во „Нвидиа“– помеѓу 615.000 и 1,3 милиони долари и во „Епл“, – помеѓу 650.000 и 1,35 милиони долари. И двете компании се директно зависни од неговите политички одлуки.

Се инвестира и во недвижнини. Првото големо патување на Трамп во странство беше во Саудиска Арабија, Катар и Обединетите Арапски Емирати, земји во кои неговото семејство лансира нови или проширува постојни проекти. На пример, во мај почна работата на „Трамп Тауер“ во Џеда, луксузен станбен комплекс со 47 ката на Црвеното Море. Семејството на Трамп има инвестиции во Катар и во Дубаи. И тоа не е сè. „Форбс“ објави дека Трамп имал големи инвестиции и во криптовалути преку свои компании, па според тоа, сака да се претстави како „криптопретседател“ и е цврсто за дерегулација на секторот.

Новинарот Дејвид Киркпатрик, во статија за „Њујоркер“, пресмета дека Трамп, неговите деца и нивните сопружници заработиле повеќе од 3,4 милијарди долари од почетокот на неговиот прв претседателски мандат. Повеќето од овие зделки и трансакции, пишува тој, речиси сигурно не би се случиле доколку Трамп останел само бизнисмен. Во емисија на НБЦ Киркпатрик изјави дека претходните претседатели и нивните деца, исто така, пронашле начини да заработат пари преку зделки – за книги или хонорари за говори, „но сето тоа било мало во споредба со бизнисот на семејството Трамп“.