Како одговор на геополитичката трка: ЕУ планира двојно да го зголеми финансирањето за Гренланд

Европската комисија во среда предложи да се издвои повеќе од двојно поголема сума пари од заедничкиот долгорочен буџет на ЕУ за финансирање на Гренланд како одговор на геополитичката трка за влијание врз арктичкиот остров, пренесува dpa.

Доколку земјите-членки на ЕУ го одобрат предлогот, Гренланд би добил 530 милиони евра во периодот 2028-34, во споредба со 225 милиони евра за тековниот период 2021-27, пренесе „Бета“.

Администрацијата на американскиот претседател Доналд Трамп постојано ја изразува својата желба да ја преземе контролата врз островот, кој е во голема мера автономен, но е дел од Данска, членка на ЕУ.

Претседателот на САД верува дека Гренланд е стратешки важен и за одбраната и како извор на минерално богатство.

Дополнителните пари планирани од Европската комисија би биле наменети за соработка на ЕУ за критични суровини и енергија, изјави комесарот за правда на ЕУ, Мајкл Мекграт.

Предложеното зголемување на финансирањето е политички сигнал што го одразува растечкото стратешко значење на прекуокеанските територии на ЕУ, рече Мекграт.

ЕУ има 13 прекуокеански територии кои се уставно поврзани со Данска, Франција или Холандија, вклучувајќи ги Гренланд во Атлантикот, Француска Полинезија во Пацификот и Аруба на Карибите.

Комисијата планира да го зголеми заедничкото финансирање на ЕУ за овие субјекти на речиси 1 милијарда евра.

Како прекуокеанска територија, Гренланд ја закотвува ЕУ во Арктикот и игра централна улога во обезбедувањето критични суровини, рече Мекграт.