Како и што најави, Трамп поднесе тужба против „Би-Би-Си“ – бара отштета од 5 милијарди долари

Како што најави, американскиот претседател Доналд Трамп поднесе тужба против „Би-би-си“ поради уредувањето на неговиот говор од 6 јануари 2021 година, во документарецот „Панорама“.

Трамп бара отштета од 5 милијарди долари (4,2 милијарди евра).

Би-Би-Си одговори дека ќе го брани случајот, или поточно својата позиција, на суд.

„Како што јасно ставивме до знаење претходно, ние ќе го браниме овој случај“, рече портпаролот на „Би-би-си“.

„Нема да даваме понатамошни коментари за тековните судски постапки“, додаде тој.

Американскиот претседател ја обвини „Би-би-си“ за клевета и кршење на законите за трговска практика, според судските документи поднесени во Флорида.

„Би-би-си“ му се извини на Трамп во ноември, но го отфрли неговото барање за отштета и не се согласи со неговото тврдење дека постои каква било „основа за тужба за клевета“.

Адвокатскиот тим на Трамп ја обвини „Би-би-си“ дека го клеветила со „намерно, злонамерно и измамнички погрешно претставување на неговиот говор“.

Трамп во ноември изјави дека планира да ја тужи „Би-би-си“ за уредување на неговиот говор во документарец емитуван во Велика Британија пред изборите во САД во 2024 година.

„Морам да ги тужам. Тие лажеа, ги сменија зборовите што излегоа од мојата уста“, им рече тој на новинарите во Белата куќа во тоа време.

Во ноември, протечена внатрешна белешка на „Би-би-си“ го критикуваше начинот на кој бил монтиран говорот, што доведе до оставки на генералниот директор на Би-Би-Си, Тим Дејви, и уредничката на вести, Дебора Тарнс.

Пред Трамп да ја поднесе тужбата, адвокатите на „Би-би-си“ издадоа долг одговор на тврдењата на американскиот претседател.

Тие рекоа дека немало злонамерност во монтажата и дека Трамп не бил повреден, бидејќи бил реизбран кратко време по емитувањето на документарецот.

Тие исто така истакнаа дека „Би-би-си“ немала права да ја дистрибуира програмата „Панорама“ на американските канали, што не го сторила.

Иако документарецот бил достапен на BBC iPlayer, видливоста била ограничена на гледачите во Обединетото Кралство.

Во тужбата, Трамп се повикува на договори што „Би-би-си“ ги имала со други дистрибутери за прикажување на содржината, особено на договори со независна медиумска корпорација која наводно имала права да го лиценцира документарецот надвор од Обединетото Кралство.

„Би-би-си“ сè уште не одговорила на овие тврдења, ниту пак корпорацијата одговорила на наводниот договор за дистрибуција.

Во тужбата, исто така, се тврди дека луѓето во Флорида можеби пристапиле до програмата користејќи VPN или користејќи ја услугата за стриминг BritBox.

„Публицитетот околу документарецот „Панорама“, заедно со значителното зголемување на употребата на VPN во Флорида од неговото премиерно емитување, воспоставува силна веројатност дека жителите на Флорида пристапиле до документарецот пред „Би-би-си“ да го отстрани“, се наведува во тужбата.

Некои од медиумските организации што Трамп ги тужеше во последно време му платија на претседателот милиони отштета како дел од спогодбите.

Судијата може да ја отфрли тужбата без судење.

Федерален судија на САД во септември ја отфрли тужбата за клевета на Трамп, која бараше 15 милијарди долари отштета од „Њујорк тајмс“, бидејќи беше поднесена во „несоодветна и недозволена форма“.

Судијата му дозволи на Трамп повторно да поднесе изменета, пократка тужба.

Правните експерти велат дека прашањето за надлежност би можело да игра клучна улога во тужбата против „Би-би-си“, бидејќи случајот ќе зависи од тоа дали некој во Флорида го гледал документарецот.

Доколку се случи судење, Првиот амандман на американскиот Устав значително ја штити слободата на говорот и слободата на печатот.

Трамп ќе мора да докаже три работи – дека содржината била фактички неточна на начин што може да се смета за клеветничка, дека претрпел штета како резултат на лажното и клеветничко известување и дека медиумската организација знаела дека содржината е лажна и дејствувала со „вистинска злоба“.

Крис Руди, основач на конзервативниот новински медиум „!Њузмакс“ и сојузник на Трамп, изјави за„ Би-Би-Си Радио 4“ дека е тешко да се добие случај за клевета во САД бидејќи „прагот е многу висок“.

Сепак, судењето би можело да го оштети угледот на „Би-би-си“, со трошоци што би можеле да достигнат помеѓу 50 и 100 милиони долари, додаде тој.

Не е јасно кога, или дали, случајот би можел да оди на суд и колку би можел да ја чини „Би-би-си“.

Марк Дамазер, поранешен директор на Би-Би-Си радио, рече дека би било „исклучително штетно за угледот на „Би-би-си“ да не се брани“, тврдејќи дека овој случај се сведува на „прашање за независноста на Би-би-си“.