| Финансиската полиција поднесе пријава против пратеникот Блерим Беџети |
Финансиската полиција поднесе кривична пријава против поранешниот градоначалник на Сарај, Блерим Беџети, двајца поранешни секретари во Општината, двајца раководители на Секторот за урбанизам, помлад соработник, раководител на Секторот за планирање и уредување на просторот во Град Скопје и против надзорен инженер. Осомничените се товарат за кривичните дела злоупотреба на службената положба и овластување, несовесно работење во службата и фалсификување или уништување деловни книги. Одобриле градба со лажна содржина на фирма што се занимава со откуп на отпад.
– Постојат основи на сомнение дека пријавените лица, вработени во Општина Сарај, иако биле свесни дека не постои донесен детален урбанистички план за катастарската парцела КП 10405/6 КО Сарај, со пречекорување на своите службени овластувања, изготвиле и одобриле извод од план и одобрение за градба со невистинита содржина, како и пресметки за надоместок за уредување градежно земјиште, спротивно на законските прописи, а надзорниот инженер извршил технички преглед на објектот и изготвил завршен извештај со невистинита содржина – стои во кривичната пријава што ја објави Финансиската полиција.
Осумтемина пријавени ѝ овозможиле на фирмата „Азра Идриз“ од селото Глумово во Сарај да се стекне со противправна имотна корист во износ од над 108 милиони денари или околу 1,8 милиони евра.
