Ако некому му требаше доказ за тоа колку е геополитички мрачен почетокот на 2026 година, тој пристигна денес од самиот врв на Европската Унија, во форма на невообичаено искрен момент на црн хумор.
Каја Калас, високата претставничка на ЕУ за надворешна политика и безбедност, позната по својот строг став и дисциплина, денес накратко отстапи од дипломатскиот протокол за време на состанокот со лидерите на клубовите на претставници во Европскиот парламент.
„Актуелната глобална ситуација е одлична можност да се почне со пиење, иако вообичаено не сум љубител на алкохол“, рече Калас, според два извори кои присуствуваа на состанокот, како што објави Политико.
Овој коментар, направен со полушеговит тон, дојде како реакција на атмосферата во просторијата. Имено, претставниците разменија низа саркастични новогодишни честитки, резигнирано наведувајќи дека 2026 година не можеше да започне полошо. Со војните што беснеат во Украина и Газа, и новата ескалација и протестите во Иран, оптимизмот во ходниците на Брисел отстапи место на исцрпеноста.
Времето на нејзината изјава дава дополнителна тежина на „дијагнозата“. Калас го кажа ова токму кога во Вашингтон се одвиваше вистинска дипломатска драма – состанокот на министрите за надворешни работи на Данска и Гренланд со американски претставници, во обид да ја „спушти топката“ по заканите на Доналд Трамп за анексија на Гренланд.
Иако изјавата предизвика смеа кај присутните, таа совршено го отсликува моменталното расположение на европската администрација, која мора да се справи со повеќе глобални кризи истовремено, додека просторот за маневрирање за дипломатски решенија станува сè потесен.
