Јулијана не ги дочека спасувачите: Извлечено телото на девојката што пред 4 дена падна од карпа на вулканот

Индонезиските спасувачи денес го пронајдоа телото на бразилската државјанка Јулијана Маринс, која падна од карпа за време на викендот додека планинареше на еден од највисоките вулкани во Индонезија, Ринџана, објави бразилската влада.

„По четиридневна потрага, отежната од неповолните временски услови, условите на теренот и видливоста во регионот, екипите на Индонезиската агенција за пребарување и спасување го пронајдоа телото на бразилска туристка“, објави бразилската влада.

27-годишната Маринс планинарела со пет пријатели на планината Ринџани кога се лизнала и паднала од карпа на планинската падина висока 3.726 метри во саботата, според соопштението на индонезиските власти.

Сместен во покраината Западна Нуса Тенгара, овој активен вулкан е популарна туристичка дестинација во архипелагот на Југоисточна Азија, наведе Ројтерс.

Локалниот шеф на спасувачките служби Мухамед Хариџади изјави дека Маринс паднала од карпа на планината, но не и во кратерот на вулканот, истакнувајќи дека мекиот песок во областа го отежнувал извлекувањето на телото, а во спасувањето учествувале 50 лица.

Хариџади рече дека телото, кое првично било забележано во саботата, се лизнало подлабоко во песочниот терен на карпата, 350 метри подлабоко.

Неколку туристи, вклучувајќи и странци, загинаа во несреќи додека се искачуваа по вулканот во последните години, вклучувајќи и еден малезиски турист кој исто така падна од карпа минатиот месец, според извештаите на локалните медиуми во Индонезија.