– Јубилејното издание ја слави интернационалната видливост на македонската театарска мисла и ја истакнува вредноста на уметниците што потекнуваат од нашата културна средина, а се етаблирале во европски и во регионални театри. МОТ ги носи на домашна сцена нивните најнови претстави, создадени во театарските куќи во регионот и пошироко, овозможувајќи им на гледачите да ги видат делата на нашите режисери, актери и сценски автори што создаваат надвор, но со јасен печат на македонската уметничка школа – информира Русе Арсов во името на тимот на МКЦ
Под мотото „Нашите во светот“, јубилејното 50. издание на „Млад отворен театар“, кое ќе се одржи од 19 до 25 ноември, во Младинскиот културен центар во Скопје, пред публиката ќе претстави внимателно селектирани претстави, концерти и изложба.
– МОТ оваа година го насочува своето внимание кон македонските автори што успешно создаваат надвор од границите на државата и во низа од половина век, постојано отвораат нови сценски хоризонти. Јубилејното издание ја слави интернационалната видливост на македонската театарска мисла и ја истакнува вредноста на уметниците што потекнуваат од нашата културна средина, а се етаблирале во европски и во регионални театри. МОТ ги носи на домашна сцена нивните најнови претстави, создадени во театарските куќи во регионот и пошироко, овозможувајќи им на гледачите да ги видат делата на нашите режисери, актери и сценски автори што создаваат надвор, но со јасен печат на македонската уметничка школа – информира Русе Арсов во името на тимот на МКЦ.
Отворањето на фестивалот е со претставата „Лимениот барабан“ (Лимениот добош), во режија и адаптација на Васил Христов, која е поставена на сцената на Југословенско драмско позориште во Белград. „Лимениот барабан“ на Гинтер Грас е еден од најважните романи на 20 век, каде што преку ликот на Оскар Мацерат, 30-годишен пациент на психијатрија, кој, како момче на три години, на почетокот од Втората светска војна донел одлука или одбил да расте. Протестирајќи против возрасните, Оскар ги коментира историските случувања од детска перспектива, цртајќи слика на светот која брза кон самоуништување. Во оваа претстава на Југословенско драмско позориште, македонската екипа е проширена и со композиторот Никола Коџобашија и со авторот на сценографијата, Константин Трпеновски.
– Од самиот почеток, МОТ ги поттикнува домашните автори да го опипуваат просторот за работа надвор од сцените на земјата, им влева храброст за сериозни исчекори со визијата што ја има фестивалот како отворен простор за нови идеи, за млад и алтернативен театар, како место каде што се судираат традицијата и авангардата, класичните сценски јазици и новите театарски естетики. Преку оваа отвореност кон експериментот, иновацијата и интернационалната размена, фестивалот придонесе за создавање на едно од највиталните и најживи културни јадра во земјата – посочува Арсов.
Со таква водилка се селектирани и другите претстави што ќе бидат изведени пред скопската публика, а меѓу нив и претставата на Андреј Цветановски „Куќа на граница“ поставена во Регионално позориште Нови Пазар, Србија, во која како авторска екипа се јавуваат и Сергеј Светозарев како сценограф и костимограф и Димитар Андоновски како композитор.
Следуваат претставите на: Ѓорѓи Ризески „Поручникот од Инишмор“, Адриана театар од Урошевац, Косово; Јана Маричиќ – „Коштана“, поставена во Народно позориште во Ниш, Србија; Ана Батева – „Кучето се засмеа“, која игра во Спам театар во Софија, Бугарија; Совран Нрецај – „Граница“, ОДА Театар Приштина, Косово; Искра Шукарова – „Врба“ и на Агнес Нокшиќи – „Слугинки“. Во придружната програма, публиката ќе може да ужива во е имерзивниот ВР- перформанс на Нина Николиќ и Борјан Стојков со наслов „Ехо од длабочината“, како и концертите на музичките состави „Звада“ и „Дис ис нот“ од Косово, во рамките на музичката блок-програма на МОТ, како и во изложбата на Константин Трпеноски.
Предвидено е фестивалот да биде затворен со „Мајката храброст и нејзините деца“ во режија на Дејан Пројковски, а во изведба на Новосадско позориште. Покрај Пројковски, како дел од авторската екипа се и Олга Панго – кореографија, Валентин Светозарев – сценографија и Сергеј Светозарев – автор на плакатот.
Авторка на годинашниот плакат на МОТ е Кристина Горовска.
Годинашната програма на фестивалот е поддржана од Министерството за култура и од Град Скопје.
Фото: „Лимениот барабан“ Принтскрин, Небојша Бабиќ/ЈДП
