Јапонската компанија „iSpace“ ќе се обиде повторно да го слета својот беспилотен вселенски брод на Месечината во петок, две години по претходната неуспешна мисија, во обид да стане првата компанија надвор од САД што успешно слета на Месечината, објави „Ројтерс“.
Компанијата „iSpace“, со седиште во Токио, очекува да им се придружи на американските компании „Intuitive Machines“ и „Firefly Aerospace“, кои веќе извршија комерцијални слетувања на Месечината.
Јапонската компанија соопшти дека се очекува нивниот втор лунарен лендер, „Resilience“, да слета на „Маре Фригорис“, базалтна рамнина на околу 900 километри од северниот пол на Месечината, во 4:17 часот наутро по токиско време, по проценето едночасовно спуштање во лунарната орбита.
Пред две години, првиот лендер на „iSpace“ се урна на површината на Месечината поради неточно отчитување на надморската височина.
Доколку слетувањето е успешно, лендерот висок 2,3 метри и роверот со големина на микробранова ќе започнат 14-дневни истражувачки активности, сè додека не дојде ледената лунарна ноќ, вклучително и снимање на реголитот, ситнозрнестиот површински материјал на Месечината, по договор со американската вселенска агенција НАСА.
Се очекува компанијата iSpace да одржи прес-конференција за да го објави исходот од мисијата.
