Јапонската влада соопшти дека планира да користи дел од помалку радиоактивната почва складирана во близина на нуклеарната централа Фукушима, оштетена од цунами, во цветните леи пред канцеларијата на премиерот Шигеру Ишиба, во обид да ѝ покаже на јавноста дека почвата е безбедна за повторна употреба.
Почвата беше отстранета од околината на префектурата Фукушима како дел од активностите за деконтаминација по нуклеарната катастрофа по земјотресот и цунамито во 2011 година и оттогаш е во привремено складирање, објави денес „АП“.
Дел од почвата оттогаш достигна ниво доволно безбедно за повторна употреба, велат јапонските власти. Владата, исто така, соопшти дека планира да ја користи почвата за цветни леи и други цели во рамките на земјиштето на владината агенција.
Планот се базира на упатствата утврдени од Министерството за животна средина во март и одобрени од Меѓународната агенција за атомска енергија.
Несреќата во Фукушима резултираше со ослободување на големи количини радиоактивни материјали од централата, а Јапонија има големи количини почва, исечени дрвја и друг отпад собрани за време на интензивните работи за деконтаминација.
Во објектот на отворено, сместен помеѓу градовите Футаба и Окума, во близина на нуклеарната централа Фукушима, складирани се 14 милиони кубни метри контаминирана почва и други материјали, а јапонската влада има за цел да најде место за отстранување на почвата до 2045 година.
Службениците сугерираат дека материјалот со низок ризик би можел да се користи за изградба на патишта и други јавни работи низ целата земја, објави „Танјуг“.
