Јала Брат и Буба Корели во Скопје со три часа жестока хип-хоп музика

И тие си имаат своја публика во Македонија. А, тоа се тие по кои се крева правот. Со години на врвот на балканската музичка сцена, со безброј хитови и милионски прегледи на „Јутјуб“, музичкиот двоец на хип-хоп музичарите од Босна, Јала Брат и Буба Корели (на кои вистинските имиња им се Јасмин Фазлиќ и Амар Хоџиќ), стартува со големата „ГОАТ тур“ во чии рамки ќе посетат повеќе од 10 европски метрополи. Неизбежно, и македонската метропола Скопје. Стартуваат токму од кај нас, по што ќе следуваат настапите во Штутгарт, Загреб, Минхен, Виена, Цирих, Берлин… и многу други градови. Турнејата ја организира  платформата „Мјузик вик“. Омилените Босанци во Скопје ќе имаат концерт на 29 ноември, во С. Ц. „Јане Сандански“, истата вечер кога и другата босанска атракција, легендарната поп-група „Црвена јабука“ со Жера, во Арената „Борис Трајковски“.За настапот на Јала и Буба се очекува присуство на толпа нивни обожаватели не само од Македонија туку и од околните држави. Ветуваат дека ќе приредат аудиовизуелно шоу кое ќе ги помести сите граници и ќе ја држи публиката во салата скоро три саати на нозе. Никој нема да посака да седне бидејќи сите ќе бидат расположени за речиси тоа тричасовно танцување во жесток ритам на хип-хоп музика. Нивниот концерт ќе започне во 21.00 часот, а, пак, вратите ќе бидат отворени уште од 19.30 часот, сè со цел да се избегнат најавените турканици. (Д. М.)