Ја давел и боксувал бремената жена, кога повикала полиција избегал од домот

Во два оделни случаја на семејно насилство се претепани жени. Хрватски државјанин ќе одговара за Телесна повреда бидејќи во домот во Скопје ја нападнал бремената сопруга со тупаници по главата и телото.

– Најпрво почнал да ѝ се обраќа на висок тон, а потоа физички ја нападнал удирајќи ја со тупаници и шлаканици по главата и телото. Потоа продолжил силно да ја притиска за вратот, иако знаел дека е во петтиот месец од бременоста. Во еден момент ја зграбил и насилно ја фрлил во креветот, по што ѝ ја удирал главата од ивицата на креветот. Престанал кога оштетената почнала да крвави, по што жртвата успеала да се засолни во тоалетот и да повика полиција и Брза помош, соопштуваат од ОЈО Скопје. Кога насилниот маж слушнал дека повикува помош, избегал од станот. Кај оштетената биле констатирани бројни повреди на главата, но и на плацентата во која е сместен плодот. Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот. Тој бил уапсен во обид да избега на граничен премин Блаце.

Во друг случај пак, жител на неготинско село бил приведен по пријава дека не почитувал судска наредба за приближување на сопругата, информираа од Секторот за внатрешни работи – Велес.

– Во 17:35 часот, полициски службеници од ОВР – Неготино го лишиле од слобода В.Ј., на возраст од 32 години од неготинско село, по претходна пријава од неговата сопруга, со која бил во бракоразводна постапка. На В.Ј. претходно му било издадено решение од Основен суд – Неготино, со забрана да ја вознемирува и да контактира со сопругата и забрана за приближување од 100 метри до домот, но, тој не го почитувал решението, ѝ се заканувал и физички ја нападнал, појаснуваат од СВР – Велес.

Бил известен јавен обвинител. Од СВР – Велес нагласуваат дека по документирање на настанот, против лицето ќе биде поднесена соодветна пријава.