Израелскиот министер за одбрана се закани дека ќе „преземе сите потребни мерки“ за да спречи едрилицата што ги превезува Грета Тунберг и другите активисти да стигнат до Газа. „Мадлин“ исплови од пристаништето Катанија во јужна Италија минатата недела во мисија да ја пробие поморската блокада на Израел.
Активистите планираат денес да стигнат до територијалните води на Газа за да достават хуманитарна помош. Но, во објава на X, израелскиот министер за одбрана Израел Кац рече дека им наредил на Израелските одбранбени сили (ИДФ) да ја спречат едрилицата да стигне до брегот и да „преземат сите потребни мерки“.
Израел почна да дозволува влез на неопходна помош минатиот месец.
Обраќајќи се на Тунберг и другите активисти, тој рече: „Треба да се вратите – затоа што нема да стигнете до Газа. Им наредив на ИДФ да дејствуваат за да ја спречат едрилицата на омраза „Мадлин“ да стигне до брегот на Газа и да преземат сите потребни мерки за таа цел“.
„На антисемитската Грета и нејзините колеги гласноговорници на пропагандата на Хамас, јасно им велам: Треба да се вратите – бидејќи нема да стигнете до Газа. Израел ќе дејствува против секој обид за пробивање на блокадата или помагање на терористичките организации – на море, во воздух и на копно“, додаде тој.
Рима Хасан, француска пратеничка во Европскиот парламент од палестинско потекло, исто така е на едрилицата. Веќе ѝ е забранет влезот во Израел. Израел почна да дозволува влез на основна помош во Газа минатиот месец по тримесечна целосна блокада. Сепак, хуманитарните работници предупредуваат дека заканата од глад останува огромна.
