Израел врши геноцид врз Палестинците во Газа, тврди комисијата на ОН

Истражна комисија на Обединетите нации тврди дека Израел извршил геноцид врз Палестинците во Газа.

Во нов извештај на Обединетите нации, објавен од Би-Би-Си, се наведува дека постојат разумни основи да се заклучи дека Израел извршил четири од петте дела на геноцид дефинирани со меѓународното право во Газа од почетокот на војната со Хамас во 2023 година: убивање членови на група, предизвикување сериозни телесни и ментални повреди, намерно создавање услови насочени кон уништување на групата и спречување на раѓања.

Како доказ за геноцидна намера, се наведуваат изјави на израелски лидери и модел на однесување на израелските сили.

Израелското Министерство за надворешни работи соопшти дека категорично го отфрлило извештајот, осудувајќи го како „искривен и лажен“.

-Всушност, токму Хамас се обиде да изврши геноцид во Израел – убивајќи 1.200 луѓе, силувајќи жени, палејќи семејства и отворено објавувајќи ја целта за уништување на Евреите, соопшти Министерството.

Израел го започна нападот врз Газа по невидениот напад на Хамас на 7 октомври 2023 година, кога околу 1.200 луѓе беа убиени, а 251 лице беше земено како заложник. Според Министерството за здравство во Газа, досега најмалку 64.905 луѓе се убиени во израелските напади.

Повеќе од 90 проценти од домувањето е оштетено или уништено, здравствениот систем е распаднат, а експертите на ОН прогласија глад во Газа.

Комисијата тврди дека израелските власти и војската извршиле четири од петте дела на геноцид според Конвенцијата за геноцид од 1948 година: Убивање на членови на групата преку напади врз цивили и цивилни објекти. Предизвикување големо физичко и ментално страдање преку директни напади врз цивили, малтретирање на притвореници, присилно раселување и уништување на животната средина. Намерно создавање услови за живот со намера да ги уништи Палестинците – преку уништување на инфраструктурата, блокада на помошта, негирање на вода, електрична енергија и гориво, уништување на медицинските установи и услови што особено влијаат врз децата. Спречување на раѓања преку нападот врз најголемата клиника за плодност во декември 2023 година, во кој беа уништени околу 4.000 ембриони и 1.000 примероци од сперма и јајце клетки.

Комисијата предупредува дека сите држави потписнички на Конвенцијата за геноцид имаат обврска да го спречат и казнуваат геноцидот. Неуспехот да се стори тоа може да резултира со соодговорност.

Бројни меѓународни и израелски организации за човекови права, независни експерти на ОН и научници претходно го обвинија Израел за геноцид во Газа. Меѓународниот суд на правдата (МСП) разгледува тужба од Јужноафриканската република, која исто така тврди дека израелските сили вршат геноцид. Израел го нарекува случајот „целосно неоснован“.