Израел планира да ги протера Палестинците во Јужен Судан?

Израел е во преговори со Јужен Судан за можно преселување на Палестинците од Појасот Газа во источноафриканската земја, изјавија повеќе извори за Асошиејтед Прес.

Таквиот потег би предизвикал сериозни хуманитарни и правни проблеми, бидејќи би ги преместил раселените жители од еден регион погоден од криза во друга земја која самата се бори со политичка нестабилност, граѓанска војна, сиромаштија и глад.

Израелскиот премиер Бенјамин Нетанјаху се повика на идејата на поранешниот американски претседател Доналд Трамп за „доброволна миграција“ како начин за ублажување на хуманитарната криза во Газа.

Слични предлози претходно беа споменати во разговорите со други африкански земји, но беа пречекани со силна осуда од палестинските власти, организациите за човекови права и голем дел од меѓународната заедница, кои ги сметаат ваквите планови за форма на присилно раселување и кршење на меѓународното право. Потенцијалниот договор со Израел би можел да ги зајакне дипломатските врски на Јужен Судан со Тел Авив, но исто така да отвори врата за соработка со Соединетите Американски Држави. Иако администрацијата на Трамп предложи слични опции претходно оваа година, се чини дека во меѓувреме ги напуштила.

Извори велат дека се очекува израелска делегација да го посети Јужен Судан, каде што би се дискутирало за можноста за воспоставување привремени кампови за Палестинците, со финансирање на изградбата од страна на Израел.

Египет, според извештаите на медиумите, силно се спротивставува на преселувањето на Палестинците од Газа, плашејќи се од прилив на бегалци кон нејзината граница и наводно лобирал во Јужен Судан против прифаќањето на планот. Јужен Судан, земја со околу 11 милиони луѓе, останува многу зависна од меѓународната помош. И покрај мировниот договор потпишан пред седум години, присутни се политички тензии и насилство, а некои локални жители изразуваат загриженост за можните религиозни и етнички тензии што би можело да ги предизвика преселувањето на Палестинците.