“Израел ќе направи сериозна грешка ако ја окупира Газа“, вели Тајани

Италијанскиот вицепремиер и министер за надворешни работи Антонио Тајани изјави дека Израел би направил сериозна грешка ако одлучи да ја окупира Газа. Обраќајќи се пред новинарите во Долниот дом на Парламентот, тој повтори дека Италија не е подготвена да ја признае државата Палестина.

„Признавањето на Палестина кога Палестина не постои е правна фикција, тоа не е политичка одлука. Ние сме за палестинска држава, тоа е јасно, тоа го кажуваме со години“, нагласи тој, пренесува Ansa.

Тој додаде дека Италија работи на изградба на палестинска држава.

„Веќе кажав што треба да се направи и што сме подготвени да направиме: ни треба мисија на Обединетите нации предводена од арапските земји и ние сме подготвени да ги испратиме нашите трупи. Кога Палестина ќе се обедини, тогаш можеме да ја признаеме државата“, нагласи тој.

Според него, Италија ја признава Палестинската самоуправа, но Хамас мора да си замине. Запрашан да коментира за признавањето на Палестина од страна на други земји, Тајани рече дека другите земји можат да кажат што сакаат, но дека тој студирал право и се сеќава на некои работи.

„Земете ги првите три страници од дефиницијата за држава и погледнете“, рече тој.

Четири земји објавија дека ќе ја признаат Палестина во септември: Канада, Франција, Обединетото Кралство и Малта. Шпанија, Ирска и Норвешка формално ја признаа палестинската држава на крајот на мај минатата година. Поголемиот дел од земјите во Обединетите нации, 147 од 193, веќе ја признаваат палестинската држава, која моментално има статус на набљудувач во ОН.