Израелските одбранбени сили (ИДФ) соопштија дека извршиле воздушен напад врз „високо рангиран“ оперативец на Хезболах во Бејрут.
Според либанските медиуми, објавени од „Израел тајмс“, нападот се случил во јужните предградија на Бејрут, област позната како упориште на Хезболах.
Воените претставници изјавија дека целта бил вториот највисоко рангиран оперативец на организацијата, Хаитам Али Табатабаи. ИДФ соопшти дека наскоро ќе објави повеќе детали.
Израел ги засили нападите врз Хезболах во последните недели, обвинувајќи ја групата за кршење на едногодишното примирје и изразувајќи незадоволство од бавното темпо на либанските напори за разоружување на организацијата.
Сепак, Израел досега се воздржа од напад врз либанскиот главен град.
Последните израелски напади врз Бејрут се случија во јули.
