Во Домот на културата „Кочо Рацин“ во Скопје, (галерија „Ко-ра“) на 1 септември, со почеток во 20 часот, ќе биде отворена изложбата „Откривање на нашата природа“ на авторките Ивона Велковска, Катерина Филиповска-Стефановска и Розета Картова. Куратор на изложбата е Виолета Калиќ.
„Современото живеење и технолошкиот напредок сè повеќе го оддалечуваат човекот од природата, од себеси, а со тоа и од човечноста. Затоа секој допир со природата отвора нови хоризонти, создава ново чувство на слобода, убавина и длабока поврзаност која треба да биде не само доживеана, туку и сочувана, негувана. Авторките преку сликарските дела изработени во акрил, масло и комбинирани техники на платно, како и фотографски записи, го споделуваат своето лично доживување на природниот свет и неговата нераскинлива поврзаност со човечката внатрешна состојба, како и со духовната и емоционална рамнотежа“, посочува меѓу другото Ивона Велковска, авторката на проектот.
