Изложба „Лица“ на Ангел Коруновски во „Мала станица“

Во „Мала станица“ на 24 декември во 19:00 часот, ќе биде отворена изложбата „Лица“ на уметникот Ангел Коруновски. Оваа серија е инспирирана од невидливото: анонимните, занемарените и замолчените поединци што се движат низ сложеноста на глобализираниот и наметнато корумпиран свет.

Преку синтеза на колаж, гест, акција и на апстракција, овие дела даваат визуелна форма на човечкото присуство што постои под површината на модерната бучава. Секој портрет произлегува од слоеви искинати весници – фрагменти од масовните медиуми што го претставуваат огромниот тек на глобалните информации. Самите материјали, некогаш носители на јавна вистина, се пренаменети во интимни, лични наративи. Експресивните ознаки и дамки стануваат траги од емоции, отпор и преживување во рамките на системите што постојано ја бришат индивидуалноста.

Лицата се нецелосни, фрагментирани и делумно замаглени, отсликувајќи ја состојбата на оние што се борат да останат видливи во свет кој ја мери вредноста преку потрошувачката и конформизмот. Во оваа тензија меѓу препознавањето и исчезнувањето, делата го поставуваат прашањето што значи да се биде човек во ера во која идентитетот е посредуван од моќта, економијата и од спектаклот.

Овие дела се чин на емпатија и бунт – визуелно сведоштво за луѓето што искрено се обидуваат да живеат, да останат луѓе среде корупција и хаос. Тие стојат како сведоци на тивко достоинство, потсетувајќи нè дека зад секој фрагмент од вестите и зад секој глобален наратив постои вистинско лице, вистински живот и невидена вистина под површината на модерната бучава.