Вербата во онлајн љубовта скапо го чинела 76-годишен Белгиец, кој верувал дека се допишува со позната француска манекенка. Убеден дека неговата идна сопруга го чека, тој патувал 800 километри до нејзиниот дом – само за да ја открие болната вистина.
Пензионерот мислел дека патува во Франција за конечно да ја запознае „љубовта на својот живот“ – познатата манекенка Софи Вузланд, на која верувал дека ѝ испратил 29.000 евра.
Но, кога Мишел пристигнал на адресата во Сен-Жулиен, Франција, наместо романтична средба, го пречекал сопругот на бремената манекенка, Фабиен. Илузиите на Мишел биле разбиени кога се претставил како „иден сопруг“ на 38-годишната Софи, само за ладно да му биде кажано: „Па, јас сум сегашниот“.
Со месеци, Мишел верувал дека се допишува со Софи преку WhatsApp. За време на лажната онлајн романса, тој испратил 29.000 евра на нејзината сметка, верувајќи дека ѝ помага финансиски.
Се покажало дека бил измамен – некој се преправал дека е Софи, поранешната прва придружничка на изборот за Мис Франција 2007. Целата ситуација излезе на виделина кога Софи и Фабиен објавија видео на социјалните мрежи за да ги предупредат другите за опасностите од онлајн романтичните измами.
„Мислам дека ми направија валкана шега. Јас сум будала“, вели Мишел во видеото додека му ги покажува пораките на Фабиен.
„Мојата сопруга? Не, тоа се лажни профили. Мора да бидете многу внимателни“, рече сопругот на моделот.
Видеото беше споделено на Инстаграм без да се открие идентитетот на Мишел, со пораката: „Многу ми е жал за овој човек. Пазете се од лажни профили. Го споделувам ова видео за да покажам дека овие работи навистина се случуваат и дека мора да бидете внимателни. Бидете внимателни.“
Софи, која очекува дете со Фабиен, призна дека инцидентот длабоко ја погодил. „Ме боли срцето“, рече таа.
„Браво за правењето на ова видео – луѓето треба да знаат колку лажни профили има и колку треба да бидат внимателни“, коментираше еден корисник.
„Кутрата Софи, а сè уште бремена во средината на сето ова… Се надевам дека ова никогаш повеќе нема да се случи“, додаде друг.
„Неверојатна приказна! Кутриот господин… страшно е да се знае дека сè уште има такви што ги измамуваат и експлоатираат другите луѓе“, се вели во трет коментар, пренесува Експрес.
Интернет измамите стануваат сè почести, па затоа е добро уште еднаш да се предупреди да бидете многу внимателни со кого разговарате, споделувате лични информации и особено кому му ги испраќате вашите пари.
