Избегнувајте да ги земате овие додатоци навечер

Иако често се препорачува да се земаат додатоци во исхраната навечер, неврологот  д-р Алан Мандел предупредува дека ова не е секогаш добра идеја. Во едно видео, тој објасни дека постојат одредени витамини кои треба да се избегнуваат пред спиење бидејќи можат да влијаат на квалитетот на спиењето. Недостатокот на сон може да влијае на концентрацијата, да го зголеми нивото на стрес, да придонесе за зголемување на телесната тежина и да предизвика други непријатни симптоми.

Додатоци во исхраната кои не треба да ги земаме непосредно пред спиење.

Витамин Б-12
Витаминот Б-12 е клучен за производство на енергија и правилна функција на мозокот, но д-р Мандел советува да не се зема навечер. „Б-12 може многу силно да го стимулира централниот нервен систем и со тоа да го наруши вашиот сон“, истакнува тој. Токму затоа што многу луѓе го земаат за проблеми со замор и концентрација, логично е дека неговото дејство не е пожелно непосредно пред спиење.

Витамин Д
Познат и како „витамин на сонцето“, витаминот Д игра важна улога во здравјето на коските и имунолошкиот систем. Сепак, неврологот предупредува дека може да има негативно влијание врз сонот бидејќи се меша во лачењето на мелатонин, хормон кој го регулира ритамот на спиење. „Витаминот Д може да го отежни заспивањето и одржувањето на спиењето“, објаснува тој.

Витамин Ц
Иако е познато дека витаминот Ц го зајакнува имунитетот, неговото земање пред спиење може да биде контрапродуктивно. „Витаминот Ц може да предизвика гастроинтестинални нарушувања, а ако го земете непосредно пред спиење, може да има благ стимулирачки ефект и да го отежни опуштањето“, вели д-р Мандел.

Витамин Е
Овој витамин често се користи поради неговите придобивки за кожата и косата, но може да предизвика и непријатни дигестивни проблеми ако се зема навечер. „Витаминот Е може да предизвика и гастроинтестинални проблеми кои можат да бидат непријатни и да го нарушат сонот ноќе“, забележува д-р Мандел.

Значи, ако сакаме да ги искористиме придобивките од овие витамини без ризик од нарушување на нашиот сон, д-р Мандел препорачува да ги земаме порано во текот на денот, идеално наутро со кафе. „Ќе ви даде многу енергија, ќе го подобри фокусот и, најважно од сè, ќе ви помогне да останете здрави“, заклучува тој.