Македонскиот ракометен клуб Вардар ги започна подготовките за новата сезона. Клубот сè уште го води Гилермо Милан, иако има најави за негово заминување, а на негово место како главен кандидат да ја преземе клупата е пензионираниот крилен играч на хрватската репрезентација, Иван Чупиќ, пишува хрватски „Индекс“.
- Како што дознаваме, Чупиќ има понуда од Вардар, како и од неколку други клубови. Прославениот ракометар ја започна својата независна тренерска кариера минатата сезона, а досега го водеше само клубот од неговиот роден град, кој успешно го спаси од испаѓање. Пред тоа му беше помошник на Андрија Николиќ во Загреб, пишува хрватскиот портал.
Македонската спортска јавност добро го памети овој ракометар кој му ја донесе првата од двете титули во лигата на шампиони на Вардар, со погодок против моќниот ПСЖ во финалето во последните секунди од натпреварот.
Хрватското крило играше за тимот од Скопје од 2016 до 2021 година и беше еден од клучните играчи во тимот за освојувањето на бројните титули на Вардар, меѓу кои и оние две во ЛШ.
Во последните години, Вардар е далеку од резултатите што ги постигна во своите најдобри денови. Оваа сезона, под водство на аргентинскиот тренер, завршија втори во домашното првенство поради поразот во последниот натпревар на домашен терен од Пелистер, кој се закити со титулата. Претходно, „црвено-црните“ го освоија Купот сезонава.
